Manipur squad ṭhat ber ṭum a ni - Manipur coach

Manipur-in kum 2002-ah Santosh Trophy an thleng a, final-ah Kerala 2-1 a hnehin North East state zinga India rama football inelna sang bera champion hmasa ber a ni - Manipur coach Dhonen Singh chuan kumin an squad hi tun hnaia an ṭhat ber ṭumah a ngai.

'North East football powerhouse' tiha sawi ṭhin Manipur-in tun hnaiah result ṭha an nei lo. Final round an thlen hnuhnun ber pawh kum 2013 daih tawh kha niin Punjab, West Bengal leh Karnataka te awmna group-ah point hmu loin an tla.

Manipur-in India ram football-a an hming chuai mai tur chu ngai ngam loin tun hnaiah harhtharna an chang a, Santosh Trophy Qualifier khel tur zingah Indian Super League player pali ngawt an tel.

Manipur coach Dhonen chuan, "Tun hnaia Manipur aiawha team fehchhuakah chuan tuna kan team hi an ṭha ber ang. State pawn lama player tawnhriat ngah player kan kawl tam avangin 2014-a Mizoram rawn kal ai pawh khan an ṭha zawk," a ti.

Manipur coach Dhonen hi Manipur State League-a Anouba Imagi Mangal (AIM) champion puitu a ni a, tun ṭum hi an state team a vawi hnih hruaina niin 2015 khan North East state-te football inelna sang Dr TAo Football final-ah Assam hnehin a champion pui a, hemi ṭum hian Mizoramin semifinal-ah inelna thlengtu Assam an hneh lo.

Arunchal Pradesh tel theih loh vangin Mizoram leh Manipur hi
ṭum hnih an inkhel dawn.Manipur goalkeeping coach Puthiba Ngaihte chuan, "Hmarchhak state-ah chuan team ṭha pahnih kan ni a, group hrangah awm ila final round kan luh ve ve ka ring. Amaherawhchu duh anga fixture a kal loh takah chuan Arunachal rawn kal lo tur hi a fuh zawk. Vawi hnih inkhelh aṭangin team ṭha zawk a hriat ang. Mizote hi football ngaina tak an ni a, a khel hmuhnawm zawk zawk mipuiin an ṭan ka beisei," tiin Vanglaini palai a hrilh.

Manipur hian ISL player Lalit Thapa, Y Raju Mangang, M Govin Singh leh Kh Jibon Singh bakah midfielder ball thiam Md Imran Khan leh i league-a tawnhriat ngah striker hmuhnawm Seikhohao Tuboi te an kawl avangin foot-ball hmuhnawm an lantir thei ngei ang.

Kum 1978 leh 1981 inkara Mizo-rama coach hna lo chelh tawh Manipur manager Amutombi Singh chuan, "Manipur hi kan tlahniam lo a, tun hnaiah Mizoramin football-ah hma an sawn nasat avangin kan langsar lo mai a ni. India rama Manipur hming lang leh turin grassroots football aṭangin ṭan la thar a, senior team-te pawh inthup bo reng kan tum lo. Mizoram nen hian minute 180 chhunga thawkrim zawk an chak ang, Pathian pawhin thawkrimte chu mal a sawm ṭhin kha," tiin a sawi a, Mizoramin football-ah nasa taka hma an sawn thu a sawi bawk.

Manipur Squad

J. No. Name Club Position

1 Lalit Thapa Pune City FC Goalkeeper

19 Bishorjit Singh Royal Wahingdoh Goalkeeper

20 Md Tajuddin NACO Goalkeeper

5 Y Raju Mangang North East United Left Back

2 M Govin Singh Pune City FC Centre Back

3 Kh Jibon Singh NEROCA (Loan -NE Utd) Centre Back

18 Nelson Kom FC Zalen Left Back

4 Md Sohail NEROCA Right Back

17 T Raju Singh SSU. Right Back

7 Md Imran Khan NEROCA Centre Midfielder

6 Th Sangkar Singh TRUGPU Centre Midfielder

8 K Phalguni NISA Centre Midfielder

13 Th Roshan Singh SSU Centre Midfielder

14 Ch Anand Singh NEROCA Left Winger

12 David Ngaite FC Zalen-Loan Left Winger

16 M Robinson Singh TRUGPU. Right Winger

15 Seikhohao Tuboi NEROCA-Loan Forward

10 Pritam Singh Mohammedan (loan- AIM) Forward

9 Sahidur Rehman SSU Forward

11 Ng Ronald Singh NEROCA Forward

Coach : L. Dhonen Singh

Goalkeeping Coach : N. Puthiba Ngaihte

Manager : Amutombi Singh