Assam leh Meghalaya-in chakin bul ṭan

Nimin khan Santosh Trophy Qualifier North East Zone chu khelh ṭan a ni a, Group B-ah team ṭha tura rin lawk Assam leh Meghalaya ten an khingpui Nagaland leh Tripura te an hneh. Group khat aṭangin a sang ber chauhin final round an luh dawn avangin inkhel a ngaihnawm chho ang.

Lammual inkhel hmasa zawkah Assam-in first half-ah goal an khung thei lo a, hun chanve hnu lama Sibra Nazaray leh Rahul Das te goal hmangin Nagaland 2-0 in an hneh. Rawlthar rual awm khawmna Nagaland hian bul ṭan ṭha mah se an chance neih goal-ah an chantir thei lo a, hun tawpah chak phu zawk Assam-in hnehna an chang.

Assam winger Nabi Raha chu minute 75-naah hnawhchhuah a ni a, Lunglei forward ASEB tana khel Jessy Vanlalmuana chuan hun tawp dawnah Assam tan khelmual a rawn rap ve bawk.

Assam coach Kamlakamta Singh chuan, "Goal difference a pawimawh a, goal hnih chauha chak hi result
ṭha a ni lo. Nagaland pawhin goal khungna chance an nei a, kan khel
ṭha tawk lo a ni," tiin a sawi.

Inkhel hnuhnung zawkah Mizo coach Lahmingthana Darlong hnuaia khel Meghalaya-in first half-ah goal khung thei lo mah se second half-ah goal li zet khungin Tripura 4-0 in an hneh.

Meghalaya goal hmasa ber hi coach Hminga fapa Vinicil Lalnunpuia Darlong-in minute 50-naah a khung niin Teiborlang Siangshai, Bansharai Sun leh substitute Samson Songrum ten an khung belh.

Meghalaya coach Hminga chuan, "First half-ah kan khel ṭha zawk a, mah se Tripura tlarhnung kan su tlang thei lo. Goal li kan khung a, result ṭha tak niin ka hria," tiin Vanglaini palai a hrilh.