December-ah India Open 2020

Badminton World Federation (BWF) chuan season kal laia tournament khelh tur a siksawi nual. India Open chu December 8-13 chhung hian New Delhi-ah khelh a ni ang.

Hripui Covid-19 vangin March thla hnu lamah inelna neih theih a ni lo, tournament ṭhenkhat chu kumin atan ṭhulh a nih bakah a hun sawn a ni. BWF chuan tun hnai khan inelna 17 lai mai chu a khelh hun tur a siam ṭha.

Tournament khelh hun sawn zinga mi - German Open (March 3-8), Swiss Open (March 17-22), European Championships (April 21-26) leh Australian Open (June 2-7) te chu khelh hun tur tih chian theih a la ni lo thung.

BWF secretary general Thomas Lund chuan, "Ram hrang hrangin engtik hunah nge inkharkhipna hun an hlih dawn hriat a ni lo a, tournament kan khelh theih hun tur pawh a la chiang lo. Amaherawhchu, keini lam chuan a theih anga hmain tournament khelh dan tur hi kan tih chian a ngai si a ni," a ti.