Ronaldo tan 'Capocannoniere' a la beisei theih em?

Serie A-a goal khung tam ber hnenah 'Capocannoniere' pek ṭhin a ni a, footballer ropui ber zinga mi Cristiano Ronaldo hian a dawng ve ang em tih hi hriat a châkawm hle. Portuguese chhuanvawr Ronaldo hian Premier League Golden boot vawi khat a dawng a, La Liga-ah erawh vawi thum zet 'Pichichi Trophy' a dawng.

Goal khungtu ropui Ronaldo hian kum upat hnuah Serie A a pan a, season liam ta khan match 31 inlanin goal 21 a khung. Portugal captain hian tun season-ah erawh match 22 chauh inlanah goal 21 a khung tawh a, amaherawhchu Lazio forward Ciro Immobile-a'n match 26-ah goal 27 a khung tawh avangin hmabak a harsa ṭalh ang.

Italy rama football inelna sang ber Serie A hi kum 1898 aṭangin khelh ṭan a ni a, 1929–30 season aṭangin round-robin league-in an khel ṭan. Serie A-a goal khung tam ber hnenah hian Capocannoniere hlan ṭhin a ni a, sap ṭawng chuan 'top scorer' tihna a ni.

Italy hi tlarhnung ven thiam avangin an lar ṭhin a, striker tana goal khung harsatna hmun a ni. Capocannoniere dawng hnem ber chu Gunnar Nordahl a ni a, Swedish striker hian 1950-1955 inkar khan vawi nga ngawt a dawng.

Vawi hnih dawng thei pasarih zingah France leh Juventus legend Michel Platini chu a langsar a, 90s hnu lama vawi thum dawng thei chu Giuseppe Signori chiah a awm. Lazio striker Signori hian top scorer vawi thum a nih hian goal 30 khung tling a nei lo.

Player langsar zingah Marco van Basten, Mauro Icardi, Andriy Shevchenko leh Zlatan Ibrahimovic te chu vawi hnih top scorer ni thei an ni a, ṭum khat chiah top scorer zingah Diego Maradona, Alessandro Del Piero, Francesco Totti, Gonzalo Higuain leh Filippo Inzaghi te an tel bawk.

Cristiano Ronaldo hi kum 35 mi a ni tawh a, a hun hnuhnung lam a ni tawh. Portuguese forward hi Premier League a khelh laiin rawlthar a ni a, golden boot a dawn ṭumin league-ah goal 31 a khung tih loh chu goal 20 a khung tlin a nei lo.

La Liga-ah erawh Ronaldo a puitling tawh a, season tinin goal 20 a khung tling ziah a, goal 48 khung tlin ṭumte a nei hial. Heti khawpa ropui Ronaldo hian Serie A-a season hmasa berah goal 21 a khung a, amah aia khung tam hi Fabio Quagliarella (Sampdoria) - 26, Duvan Zapata (Atalanta) - 23 leh Krzysztof Piatek (Genoa/Milan) - 22 te an awm.

Tun season-ah Ronaldo-a'n player pakhat chiah tluk loh a nei a, Lazio striker Ciro Immobile-a'n goal 27 a khung tawh. Ronaldo hi a kum a upat tawh avagin match zawng zawngah a inlan thei lo a, Immobile aiin match liin a khel tlem. 

Chutihrualin Italian striker Immobile hian a khelh zat aia tam a pet goal a, Ronaldo hmabak a harsat phah sawt. Serie A khelh chhunzawm a nih chuan match 13 khelh tur a la awm a, Ronaldo tan 'Capocannoniere' dawn theihna kawng a la inhawng. Portuguese star hian kuminah a dawng loh a nih chuan season tharah a harsa zual tawh ang.