Louis Van Gaal a mualpho zel

Kum 1999-ah Manchester United-in Champions League, Premier League leh FA Cup-ah nomawi an chawi vek a, Sir Alex Ferguson-a hnuaia United ropui vanglai a ni. Hemi kum vek hian Denmark-ah club thar a piang a, a hming chu FC Midtjylland tih a ni.

Ningani zan khan club inthlau tak pahnih hi MCH Arena-ah an inkhel a, Danish club FC Midtjylland hian 2-1 in hnehna an chang.

English club-in Wayne Rooney an chhawr theih loh thu an tih chian hnuah vawi tam United chhanhim tawhtu David de Gea chu warm up-naah a inhliam ve leh a, Red Devils-in first team player 13 zet an chhawr thei lo.

United hotuten Louis van Gaal-a'n team ṭha ber a chhawr thei lo tih hre mah se Danish club hi an hneh an beisei a, an chak loh takah chuan Dutch manager dinhmun a derthawng sawt. English manager lar Harry Redknapp phei chuan United-in Van Gaal an ban dawn tih a chian thu a sawi.

Premier League-a Sunderland an hneh loh hnuah United manager hian Europa League chu champion theihna tur a nih thu a sawi. PSV winger hlui Memphis Depay hmangin hma an hruai a, Danish champion-in Pione Sisto leh Paul Onuachu hmangin an chhang let a,United tan Jesse Lingard-a'n goal khungna hun ṭha nei mah se a vannei tawk lo a, goal bar a pet per. Inkhel tawp thlengin goal dang a lut tawh lo.

Dutch manager Van Gaal chuan, "Bul kan ṭan ṭha lo a, a tir minute 15 chhung vel kha a chhe zual. Second half-ah pawh hmasawnna hmuh tur a awm chuang lo, kan ball chan kan humhim ṭhat tawk loh bakah goal khung turin kan nawr na tawk lo," a ti.

Midtjylland hian season hmasa khan kum 16 hnua a vawi khat nan Danish Super Liga title an la a, tun season hi Europe-a an inlan vawi khatna a ni. Denmark club hian Europa league group stage thleng tur hian playoff-ah Premier League club Southampton an lo hneh tawh bawk.

Champions League group stage paltlang zawh loh vanga Europa League khel Man United tan hian beisei bo tawp a la ni bik lo a, Old Trafford-a second leg an khelh hunah phuba lak theihna hun an nei ang.