Minute 90-ah a la goal lo

Mizoram leh Manipur-te inhmachhawn ṭum khatnaah Lammual mawi tawk mipui an pungkhawm a, goal awm loin an inhnehtawk - Mizoram-in goal bar vawi hnih a tihper.

Nimin tlai Santosh Trophy Qualifier North East Zone in-khelah a goal lo a, second leg a hmuhnawm sawt ang. Thawhṭanni tlai dar 2:00-ah Mizoram leh Manipur-te Lammualah an intawng leh dawn a, goal khung tam zawkin Nagpur-ah final round an khel ang.

Goal chance a tam

Inkhel nung ṭha tak ni lo mah se goal chance a tam avang--in inkhel a hmuhnawm.

Mizoramin bul ṭan chhe lo mah se Manipur-in chance ṭha an nei hmasa a, freekick pet
aṭanga ball per chu changtu nei lo Manipur forward Pritam Singh-a'n goal-ah a chantir thei lo.

Mizoram midfield-ah Lalmuanpuia'n ro a rel a, amah-erawhchu Manipur defender ISL-a khel ve ve Govin Singh leh Jibon Singh-te inkawp sut tlang an harsa hle.

Mizoram captain Lalrin-chhana'n minute 23-naa Ram-fangzaua freekick a tauh phei chu Manipur keeper Lalit Thapa-a'n a dang a, crossbar-in a chhanhim. Manipur hi minute 13 hnuah crossbar thoin a chhan a, Sawm-fela freekick a goal teuh hle.

Second half ṭantirhah first half-a khel ṭha lo Dawngtea leh Sawmfela an hmuhnawm a, Chanmari FC forward Sawmfela pet Manipur keeper ISL-a Pune City-a khelin a dan chu ṭha tak a ni. Mizoramin goal chance nei mawlh mawlh mah se goal an khung thei lo.

Manipur-in chance nei lawk lo mah se minute 75-naa an chance erawh goal thun ngeina tur a ni a, keeper Arema'n Pritam-a pet dangin Mizoram a chhanhim.

Hun tawp lamah chance a tam a, minute hnih chiah a awm tawh tihin Mizoram player panga Rinchhana, Muanpuia, Rosanga, Joseph leh Sawmfela ten ball inpe kualin Manipur tlarhnung an ṭhiat a, Kelkang tlangval Mapuia'n goal ruakah a khung lo! Hemi hma hian Dawngtea tauh luh chu offside vangin pawm a ni lo bawk.

Injury time thlengin goal chance a awm a, Manipur midfielder Imran Khan-a'n kawh zetin goal sirah a pet a, Sohail Shah 'throw in'
thui zet chu Tuboi-a'n a khung lo. Mizoram tan Mapuia leh Dingngheta ten chakna goal an khung thei bik lo a, goal awm loin inkhel a tawp.

Eng nge an sawi?

Mizoram coach HC Zarzo-liana chuan, "Manipur kha an sawi aiin an ṭha lo a, an fitness a
ṭha lo. Goal chance kan hlah nasa lutuk kha mak ka ti. Organiser lamin ball an thlak dawn tih an sawi lo a, NIVIA Antrix kha kan vawi khat petna a ni a, a sawh duh em avangin khelh a har a ni," tiin a sawi.

Manipur coach Dhonen Singh chuan, "Kan vawi khat khelhna a ni a, ground kha hriatthiam a har a ni. Kan khel
ṭha lo a, vawi hnihnaah chuan a dan a dang tawh ang," tiin a sawi.

Tute nge inlan?

Mizoram (4-1-2-3) : Arema; Zautea, Rinchhana, Notea, Rosanga; Ṭ-a (Muansanga 82'); Dawngtea (Mapuia 80'), Muanpuia; Dingngheta, Sawmfela, Fakzuala (Joseph 75').

Manipur (4-4-2) : Lalit Thapa; Raju Mangang, Jibon Singh, Govin Singh, Sohail Shah; Anandkumar, Imran Khan, Sangkar Singh, Robinson Singh (David Ngaihte 70'); Pritam Singh (Shidhar Rhaman 85'), Tuboi.