Champion nomawi a la hlâ - Rakitic

Barcelona midfielder Ivan Rakitic chuan La Liga-ah point rukin hma hruai fal rih mah se cham-pion tuma inelna chu a la tawp lo a, kawng thui tak zawh tur an la neih thu a sawi.

Barcelona chuan zanin dar 8:30 hian league match khel turin Las Palmas an tlawh dawn a, inelna hrang hranga match 31 chhung an tlawm tawh loh record chu chhawm nun an tum zel dawn.

Croatian international chuan, "Kan thawhrim vangin hnehna chan zel hi kan phu a, mahse kan inthlahdah thiang lo. Nuamti taka inkhel zel tur chuan kan inbuatsaihna a ṭhat tawk a ngai a ni," a ti.

Catalan club hnuaiah hian point 54 hmu Atletico Madrid an awm mek. Pathianni zan dar 1:00-ah Villarreal an mikhual ang a, table-a pathumna Real Madrid chu zan dar 8:30-ah Malaga khel turin an zin chhuak bawk ang.