Bayern inhrosa tuartu Frankfurt

Intawn hmasakin goal nga an chhuah a, an mualpho. Intawn lehnaah erawh Bayern Munich chuan Eintracht Frankfurt chu 5-2 in an sawp let. Inrinni zana Bundesliga champion inhrosa vel hi Borussia Dortmund chuan ralkhat aṭangin an lo thlir reng.

Dortmund pawhin an mikhualna ramah Wolfsburg 2-0 in an hneh a, German club lian pahnih hi May 26, Thawhlehni zan dar 10:00 han Signal Iduna Park-ah an intawng zui dawn, an inthlauhna point li chauh a nih avangin 'Bundesliga Final 2020' tih hiala sawi theih a ni.

Nikum November thla khan Eintracht Frankfurt khelmualah Bayern hi 5-1 in an mualpho a, coach Niko Kovac chu a hnuah an ban phah hial; a hmun ruak luah turin Hansi Flick ruat a ni - intawn vawi hnihnaah chuan boruak a danglam ta hle.

Allianz Arena-a inkhel entu 75,000 vel bawr awm ṭhin kha hri leng vangin hmuh tur an awm lo a, mualneitu lam phurna erawh a nep phah chuang lo. Leon Goretzka (17') leh Thomas Muller (41') te goal hmangin chawlhlawk laiin 2-0 in hma an hruai.

Second half-ah Robert Lewandowski-a'n (46') an goal thumna a khung a, mikhual defender Martin Hinteregger-a'n minute 52-na leh 56-naah goal hnihin a chhanglet a, vawi leh khatah inkhel a nung. Amaherawchu Alphonso Davies-a'n minute 61-naah goal a khung a, Bayern dinhmun a ṭha. 

Bavarians chakna kawng erawh a awlsam lo - captain Manuel Neuer-a'n Frankfurt midfielder Mijat Gacinovic goal khung tur ṭha takin a dang a, Flick-a hote nuam sain an awm theih phah. Frankfurt 'hero' ni thei dinhmuna ding hman Martin Hinteregger-a'n minute 74-naah an lamah a ti lut a, Bayern-in 5-2 in hnehna an chang.

Hnehna an chan danah Bayern Munich coach Hansi Flick a lungawi hle, German manager chuan, "Inkhel thunun chungin hnehna kan chang, a lawmawm takzet. Tlarhnung laiah David Alaba ṭha takin a khel thei a, forward Muller inpekna leh finna zar kan zo bawk.

"Engkim mai kha kan ruahman dan deuh vekin a kal, goal thum kan khung hmasa a, a hnu lamah tihsual nei ve zauh mah ila a harsa tawh lo," a ti. 

Bayern boss Flick hian Thawhlehni zana Dortmund nen an inkhelh tur chu inkhelh tur a lam tam avangin 'Bundesliga Final' anga sawi a la rem loh thu a sawi tel thung.

    Ngaihnawm

•    Goretzka-a'n season kal laiah league goal li a khung tawh a, kum 2020 chhunga a khung vek a ni.

•    Muller-a'n tun season Bundesliga-ah a ṭhiante goal khung tur vawi 17 a siamsak tawh a, goal sarih a khung tawh bawk.

•    Bayern legend Gerd Muller (1971/72) tih lohah chuan Lewandowski hi league match hmasa 27 

aṭanga goal 27 khung thei awmchhun a ni.

•    Kum 2020 bikah German club zinga tlawm la nei lo chu Bayern chauh hi an ni a, league point 39 hmuh theih zinga 37 an hmu. Chawh rualin match tina goal 3.2 khung ang an ni.

•    Allianz Arena bikah chuan Frankfurt hian November, 2000 hnu lamah hnehna chan an la nei lo, league match khel tura an lenluh hnuhnung 11-ah an 

tlawm vek.