Dortmund an thiam

Borussia Dortmund chuan Bayern Munich chu awlsam takin Bundesliga nomawi chawitir ngawt an tum bik lo. Inrinni zan khan inkhel hmuhnawm pho chhuak chungin Wolfsburg 2-0 in an luhchhuah.

Dortmund tan goal khung khawl Erling Braut Haaland-a'n pet goal lo mah se Raphael Guerreiro (32') khung tur siamsakin hma an hruai. Hliam damkawr Jadon Sancho chu bench lamah dahṭhat a la ni a, second half-ah luhtir a ni.

England international hian bul ṭan lo mah se a thiam zia a lantir hman tho, an goal hnihna Achraf Hakimi (78') khung chu Sancho siamsak a ni. Bayern nen an intawn hunah chuan khelmual chhungah hun tam zawk a hman theih tawh a rinawm.

Hun tawp hma deuhin Wolfsburg midfielder Felix Klaus (82') chuan Manuel Akanji a titlu a, video assistant referee (VAR) hman a nih hnuah red card pek a ni a, mualneitu lam tho chhuak tur an awm tawh lo.

Point thum hmuh vangin Dortmund lawm viau mah se fedender Mats Hummels chu hliam vanga lakchhuah a ngai a, a dinhmun a la chiang lo. Coach Lucien Favre chuan, "Mats kha a keartui a na, tun hma deuh aṭanga a insawiselna lai a ni.

"Sancho pawh kan zingah ni 10 vel chauh a la training a, chuti chung chuan ṭha takin a khel thei. Player pawimawh pahnih hi Bayern lakah ka chhawr dawn em tih ka sawi lawk thei lo a, hman theih tura an awm ngei erawh ka beisei," a ti.