Sunday-a'n Saturday-ah Aizawl FC chakpui

Aizawl FC-in Mumbai FC an hma-chhawn hmain match sarihah goal thum chiah an khung a, tlar-hmaa striker ṭha an mamawh zia a lang. MPL champion-in Yinka Joel Sunday Ayeni an la lut a, Nigerian striker hian Inrinni khan I League match hmasa ber khelin goal a khung nghal. Aizawl FC-in Joel Sunday leh H. Lalmuankima hmangin Mumbai FC 2-0 in an hneh a, minute 90 chhung khel ṭha MK-a chu hero of the match a thlan a ni.

Team siksawi

Spanish coach Manuel Retamero Fraile-a'n right back-a a chhawr
ṭhin Lalruatthara a laiah a awm a, a ding lam sirah a laia khel ṭha ṭhin tak Lalramchullova a awm thung.

Captain David Lalrinmuana chu inhliam vangin a inlan thei lo a, beisei loh takin midfielder Yuta Kinowaki chu bench-ah dah a ni.

Mumbai FC-in hliam vangin an player ṭha pahnih Min-chol Son leh Taisuke Matsugae-te an chhawr thei lo a, India international Arata Izumi chuan hliam vangin inkhel bul a ṭan thei lo bawk.

A goal ta

Aizawl FC coach Jahar Das-a'n inkhelh hmain season tharah I League an khelh leh tur thu a sawi a, Mumbai FC-an hmachhawn ṭumin Aizawl player-te'n I League khelh chhunzawm zel an phu tih khelmual chhungah an pho lang.

First half-ah inkhel hmuhnawm tawk lo mah se second half-ah Aizawl FC-in Joel Sunday an tlan luhtir a, ke vei lama pet thiam MK-a dinglama dahin inkhel boruak a dang ta daih.

Nigerian striker hian khel-mual chhungah minute 12 vel chiah hun a hmang hman tihin hla tak aṭangin ṭha zetin a pet a, Mumbai keeper Pawan Kumar-a'n ṭha takin a dang.

Bengaluru keeper hlui Pawan Kumar hian Lalchhawnkima leh Lalmuankima-te chance ṭha neih chu engmah loah a chantir.

Minute 66-naa winger MK-a ball cross Joel-a pet erawh Mumbai keeper tan dan hman a ni lo a, RG Stadium-a inkhel entu Aizawl FC fan-te an sapatal.

Goal luh hnuah awmze nei zawkin inkhel entute an au a, Aizawl FC player-te an phur sawt.

Minute hnih a liam hman awrh tihah MPL champion-in goal an khung leh ta a, Mumbai FC tlarhnung tana buaipui tham khawpa khel ṭha Albert Zohmingmawia ball cross chu MK-a'n goal-ah a chantir. MPL champion attack na tak chu mikhual teamin an dawl zo lo a ni ber.

Kawnpui tlangval Albert-a hian Joel-a ball cross duhthusam erawh goal ruakah a tauh lut lo a, captain Alfred Kemah Jaryan-a goal shot kawh tak chu crossbar chungah a kal bawk.

Mumbai FC-in Manipuri tlang-val pahnih Sushil Singh leh Malem-nganba Meitei hmangin chance nei ve mah se Aizawl FC tlar-hnung an ṭang tluan a, Mizo club-in 2-0 in hnehna an chang.

Jahar Das a che fuh

Aizawl FC coach Jahar Das-a'n beisei loh dan takin player rem-khawm mah se Bengali coach hian thutlukna a siam fuh hle.

A laia ding Ruatthara'n a talbuai phah loh a, Royal Wahingdoh defen-der hlui Kimkima nen tlarhnungah an ding khawng hle. Armed Veng tlangval Chullova'n tlarhma a pui
ṭha a, an position tharah player pa-hnih an hmuhnawm.

Inkhelh zawhah Bengali coach chuan player pahnih a siksawi chhan sawiin, "Ruatthara hi him dam taka khel chi a ni a, Chullova'n tlan chhuah nuam a ti thung. Kan tisual lo tih chu khelmual chhungah inhmu a ni," tiin player a remkhawm fuh thu a sawi.

Hero of the match atana thlan H.Lalmuankima second half-ah a hmuhnawm a, Bawngkawn tlangval hian ding lam sir aṭangin Mumbai tlarhnung a chhaih buai hneh hle.

Eng nge an sawi?

Aizawl FC coach Jahar Das chuan, "Kan khelh dan phung kan thlak a, pawng tawng nawr ang chi kha kan duh lo. Kan goal hi him hmasa phawt se, counter attack hmangin kan bei let ang tih hi kan ngaihdan a ni a, vawiinah a hlawhtlinna kan hmu a ni," tiin a phur hle.

Mohun Bagan coach hlui chuan, "Joel-a khan team tan a thawhhlawk takzet a, MK-a'n a khel ṭha hle bawk. Vawiina kan chakna chhan erawh keimah vang ni loin ka player-te vang a ni a, an khel ṭha takzet a ni," tiin player-te a chhuang hle.

Mumbai FC coach Khalid Jamil chuan, "Chak kan phu lo a, ka player-te khan chak duh rilru puin an khel lo a, ka lungawi lo hle. Aizawl FC khan chak an phu zawk a, point khat hlawh chhuah pawh kan phu lo," tiin chak loh chhuanlam a siam duh lo.

Hmabak

Aizawl FC-in February 28-ah Bengaluru FC an lenchilh dawn a, March 2-ah an hneh tak Mumbai FC khelmualah an leng lut ve leh dawn bawk.

MPL champion-in coaching staff thar hnuaiah chak loh an nei lo a, football ngainatuten Jahar Das-a phenah K. Malsawmkima a awm tih an hai lo bawk - Inrinni tlaia inkhelhlaia player-te kaihruaitu pawh Mala hi a ni.

Mohun Bagan an chak

Inrinni tlai I League match inkhel dangah Mohun Bagan an chak a, Kolkata club hian an mikhual Sporting Goa chu Katsumi Yusa goal hmangin 1-0 in an hneh.

I League table-a hmahruaitu ni mek Mohun Bagan tan Jeje Lalpekhlua'n inkhel bul a ṭan a, Hnahthial tlangval hian Kolkata club tan a khel ṭha hle.