Arsenal-in Hull lakah goal khung lo

Arsenal chuan awlsam takin FA Cup fifth round paltlang tum mah se Inrinni zan khan Hull City lakah goal an khung thei lo a, replay an khelh a ngaih phah dawn. Kum 101 hnua a vawi khan nan Hull hian Gunners nena an inhmachhawnah goal an chuah lo a ni.

Champion lai Arsenal hian manager Arsene Wenger enkawlna hnuaiah FA Cup-a an match 100-na an khel chiah a, French manager hian an inkhelh hnuhnung bera player a luh tir aṭangin pakua ngawt a thlak danglam.

Inkhel chu

Emirates Stadium-a inkhelah Gunners hian vawi hnih chu penalty hmu ngei turah inngai mah se refree Mike Dean-a'n an beisei ang a pe lo a, Leicester laka goal khung thei Theo Walcott leh Danny Welbeck ten Hull keeper Eldin Jakupovic an paltlang thei lo bawk.

Arsenal forward Joel Campbell freekick pet ṭha tak mai chu Jakupovic-a'n a lo khawih per hman a, goal ban a per.

Steve Bruce naute hian Gunners-in FA Cup-a match 14 chhung hnehna an chang zawn tawh chu an tih tawp sak a ni mai lo a, 2014 final-a an hneh loh leh nikum third round-a an hneh loh lakah draw result an hlawhchhuak a ni.

Hetihlai hian Arsenal beiseina a la bo vek lo a, kum 130 liamta a Blackburn Rovers record lo siam tawh a zawna FA Cup vawi thum champion ni turin Hull khelmualah hnehna chan theihna hun an la nei a ni.

Barca vang?

Europe lama che fuh hleithei lo Arsenal hian Thawhlehni zana Barcelona nen Champions League-a an inhmachhawn tur an theihnghilh lo a, Wenger-a'n a player pawimawh Mesut Ozil chu squad-ah pawh a dah loh bakah striker Olivier Giroud leh forward Alexis Sanchez te chu bench-ah a ṭhut tir bawk.

Gunners hian tun hnai season nga chhungin Champions League last 16 an paltlang thei tawh lo a, kuminah pawh hian champion lai Barca an hmachhawn dawn avangin an hna a awlsam dawn lo.

Eng nge an sawi?

Arsenal manager Wenger chuan, "Replay khelh ngai hi thil ṭha a ni lo a, mahse Hull khan tlauhnung an rem phui ṭhat em avangin a harsa. Ball 70% possession neiin goal shot vawi 20 kan nei bawk a, goal a lut lo kha chu kan vanduai ve bawk a ni," tiin a sawi.

Hull manager Bruce chuan, "Inkhelh nawn a ngai tur hi kan tan chuan thil mak a ni zawk hial. Chutih rual erawh chuan ka naute khan inkhelah 100% rilru an pek avangin khatiang result kha chu an phu," a ti.

Everton an tlang

Everton chuan tun hnai kum nga chhunga a vawi li nan FA Cup quarter-final an inhlangkai a, Ross Barkley leh Romelu Lukaku te goal khung hmangin Bourne-mouth 2-0 in an hneh.

Toffees tan Barkley chuan yard 20-a hla aṭang-in minute 55-naah goal hmahruai a khung a, Lukaku chuan minute 76-naah hnai set sawt aṭangin an goal hnihna a khung bawk a ni.

Roberto Martinez-a enkawl Toffees hian tun hnaiah goal khung an harsat lo a, inelna hrang hrangah an match hnuhnung 14 aṭangin vawi khat chiah goal khung loh an nei.

Watford leh Reading pawh

Inkhel dangah Watford chuan Leeds United defender Scott Wootton-a'n an lama a tih luh palh hmangin hnehna an chang a, kum 2007 hnua a vawi khat nan fifth round an paltlang.

Championship club Reading chuan Premier League club West Brom lakah hnehna an chang ve bawk.

West Brom tan Darren Fletcher chuan goal hmahruai khung mah se Reading hian Paul McShane, Michael Hector leh Lucas Piazon te hmangin an chhang let a ni.