Chak lo Del Potro a lawm

Kum khat dawn ban rek na vanga a inkhelh theih loh hnuah world number 4 hlui Juan Martin del Potro chu Delray Beach Open-ah a lo kir a, Argentina tlangval hi semifinal-ah chak lo mah se a hliam a dam hnua a inkhelh leh theih tak avangin a lawm hle.

Nimin khan kum 27-a upa Del Potro hi Sam Querrey lakah 7-5, 7-5 in a chak lo a ni. Querrey hian final-ah Rajeev Ram a hmachhawn leh ang.

Del Potro hian kum 2011 khan Delray Beach Open title hi a lo la tawh a, kuminah pawh hian beisei aia ṭhain a rawn khel; a match hmasa pathumah set a hloh miah lo a ni.

Chak lo mah se a hlim thu sawiin Del Potro chuan, "Hnehna chang lo mah ila ka tan chuan lawmna hmuh tur a awm zel. Rei tak ka inkhelh mumal theih loh hnuah court-ah ka lo kir leh a, tunah chuan eng tournament nge ka khelh leh ang? tiin ngaihtuahna ka seng thei tawh. Hei ringawt pawh hi ka tan chuan lawmna tham a tling," tiin a sawi. Thla leha khelh tur Indian Wells-ah inlan a tum thu a sawi nghal bawk.