Bologna-in Juventus an chelh

Serie A champion Juventus-in a zawin league match 15 chhung hnehna an chang tawh a, mahse Zirtawpni zan khan he an record duhawm tak hi an chhawm nung thei lo; Bologna nen goal lut loin an inhnehtawk.

AC Milan legend Roberto Donadoni a enkawl Bologna hian Juve goal zawnah vawi khat chiah an pet thei a, Juve tan midfeilder Paul Pogba chuan goal khung theihna hun ṭha a neih vawi hnih a chhawr ṭangkai thei bik lo.

Juve boss Massimiliano Allegri-a'n Thawhlehni zana Bayern Munich nen an inkhelh tur hre ranin Paulo Dybala a chawlh tir a, club top scorer hi minute 68-ah tlan luh tir mah se inkhel result a thlak danglam thei tawh lo.

Allegri chuan, "Result vanga lungngaihna tur a awm lo a, hei hian league-a kan inkhelh tur la awm apiang hi a hautak vek tawh a ni tih min hriatchian tir ang," tiin a sawi.

Juventus hian league-ah point hnihin hma an la hruai mek a, mahse zanin dar 1:30 a Napoli leh AC Milan inkhel result a zirin Serie A hmahruaitu thar an awm leh rih mai thei.

Inter an chak

Roberto Mancini nauten league match an khelh hnuhung vawi riat aṭangin vawi hnih chiah an chak a, an result hi a lungawi thlak loh.

Mahse, Inter hian Inrinni zan khan San Siro-ah Sampdoria chu 3-1 in an hneh, league table-ah point 48 hmuin palina din hmun an luah ve leh ta.