Ibra a chhuah loh ka beisei - Silva

Paris Saint-Germain captain Thiago Silva chuan tun season tawp ruala hmun dang pan tur nia sawi rik mek striker Zlatan Ibrahimovic chuan club a chhuahsan loh a beisei thu a sawi.

Inrinni zan Ligue 1 inkhelah champion lai PSG chuan Parc des Princes-ah Ibrahimovic goal hnih bakah Gregory van der Wiel leh Edinson Cavani te goal khat ve ve khung hmangin Reims 4-1 in an hneh.

Kum 34-a upa Ibra hian season tawpah thil mak tak a thlen tur thu a lo sawi tawh a, French club a chhuahsan tur a sawilawk naah ngaih a ni.

Brazilian defender Silva chuan, "Zlatan hi chu mi danglam bik a nih avangin goal danglam bik khung leh inkhelh thlak danglam theihna a nei. Season tawp thlengin ṭha takin a khelh chhoh zel ka ring a, ka thutlukna siam tur ni lo mah se contract pawh a pawh sei ngei ka beisei," tiin a sawi.

Silva hian PSG-in Champions League nomawi an chawi a nih chuan Ibra chu a chhuah a rin thu fiamthuin a sawi zui bawk.

Laurent Blanc-a naute hian tun season Ligue 1-ah hneh loh an la tawng lo a, match 27 khelh tawh aṭanga point 73 hmu tawhin an hnuai chiaha awm Monaco chuan point 24-in an phak lo mek.