Barcelona dang thei an awm lo

Spanish club lian Barcelona-in dang theitu an la tawng lo. Inrinni zan khan La Liga inkhelah Las Palmas chu khualmualah 2-1 in an hneh a, league table-ah hma an la hruai chhunzawm zel.

Barcelona tan Luis Suarez leh Neymar-te'n goal khat ve ve an khung a, mualneitu team tan Willian Jose chuan goal khat a khung ve bawk.

Inkhel chu

Inkhel ṭan aṭanga minute 6-na lekah Barce-lona in goal an khung nghal a, goal khungtu chu Luis Suarez a ni. Uruguay striker hian tun season-ah league goal 25 zet a khung ta a, inelna hrang hrangah goal 41 a khung tawh.

Barcelona tlarhnung an khawng tawk lo a, mualneitu team-in minute li hnu lekah Willian Jose hmangin an sut a, Catalan club an hawihai.

Player nei ṭha zawk Barcelona an talbuai rei lo a, minute 39-naah an goal hnihna an khung a, Lionel Messi-a ball pet lo per let chu Neymar-a'n a hlah lo.

Hun tawp thlengin goal dang a lut tawh lo a, Barcelona-in 2-1 in hnehna an chang.

Barca chak lohna

Barcelona coach Luis Enrique-a'n Sergio Busquets a chawlh hahdamtir a, Ivan Rakitic chu bench-ah dah a ni bawk. Catalan club hian an midfielder pawimawh pahnih tel loin an khel ṭha tawk lo a, an talbuai zeuh zeuh.

Tlarhnung lamah Barcelona an nghet tawk lo bawk. Defence line aṭanga an ball pet chhuah chhe tak avangin vawi thum vel an chesual a, Javier Mascherano leh substitute Thomas Vermaelen-te'n an dang leh hman avangin an vannei.

Tlarhma lamah erawh Suarez, Messi leh Neymar an awm a, khawvelah pawh tlarhma player turin anni aia thlan tur an awm chuang lo. MSN tia hminglem an vuah sak South American trio hian vawi tam Las Palmas tlarhnung an chhaih buai.

Tun season European league-a goal 25 khung tling thei hmasa ber Suarez-a'n hat-trick siamna hun ṭha a nei a, hnai set sawt aṭanga a tauh goal loh bakah second half-ah Las Palmas goalkeeper Javi Varas chuan ṭha takin a dan sak bawk.

Enrique thukhawchang

Barcelona manager Luis Enrique chuan, "Kan khel chhe hranin ka hre lo a, ka ngaihdan chuan ka naute khan an khel ṭha hle a ni. Goal khung theihna hun ṭha tam tak kan nei a, kan khingpuite pawn an nei ve tho. Las Palmas goalkeeper Javi Varas khan a khel ṭha em em a, inkhel tidanglamtu a ni," a ti.

Enrique chuan sawi chhunzawmin, "Ni hnih dana inkhel ziah ang kan ni a, ka naute khelh dana ka lawm rualin hmasawnna tur erawh kan la nei reng tho a ni," tiin an la inzir belh reng thu a sawi.

Hmabak

Barcelona-in February 23 zanah Arsenal chu Champions League last 16-ah an hma-chhawn dawn a, English club tan Catalan club lo mikhual hi thil chakawm niin a lang lo.