Bayern chakna Muller-a goal ropui

Thomas Muller chuan Darmstadt lakah goal mawi danglam bik a khung a, Inrinni zan Bundesliga inkhelah Bayern Munich chu 3-1 in hnehna a chanpui.

Allianz Arena-a in-khelah rin loh tak maiin mikhual Darmstadt chuan minute 26-na lekah striker Sandro Wagne hmangin goal hma-hruai an khung. Minute 586 hnua Bayern-in an khelmuala an goal chhuah lehna hmasa ber a ni.

Mahse, he goal hian Pep Guardiola naute a chhaih thinrim zawk niin a lang. Second half ṭan tirah Rafinha cross ṭha tak chu Muller-a'n an si phurh sut nan a khung. German international hian minute 71-naah a goal hnihna a khung bawk.

Muller hian a goal hnihna khung tur hian Arturo Vidal-a ball chip
ṭha tak chu defender karah a volley goal a ni. Hun tawp hma hretin Robert Lewandowski chuan an chakna nem ngheh nan goal khat a khung leh bawk.

Poland international Lewandowski hian tun season-ah a club tan inelna hrang hrangah goal 32 a khung tawh a, Bundesliga bikah goal 22 a khung tawh bawk a; an elpui club 18 lakah goal a khung kim ta chiah.

Bayern hian inkhel an thunun hneh hle a, ball possesion 81% ngawt an nei a, tun season-ah an khelmualah league match 11 khel tawhin hnehna an la chang fai vek.

German champion Bayern hian point 59 hmu tawhin league table-ah point 11 in hma an hruai fal rih a, mahse an hmahruaina zat hi nizana Borussia Dortmund inkhel result a zirin a danglam leh thei bawk.

Spanish coach Guar-diola chuan, "Inkhel thunun tak chung siin goal kan khung thei lawk lo a, Muller khan kan mamawh goal ropui a khung a, min ti lawm hle. Goal shot vawi 36 ngawt kan nei chunga vawi thum chauh a lut kha chu Darmstadt tlarhnung an fak awm hle," a ti.

Bayern Munich hian inkhel hautak an hmachhawn zui dawn a, Thawhlehni zan khian Turin club lian Juventus nen Champions League last 16 match an khel ang.

Inkhel dangah mana-ger kum 28 leka upa Julian Nagelsmann kaihhruaina hnuaia a vawi khat nan Hoffenheim-in point thum an hmu a, Mainz lakah 3-2 in hnehna an chang.