Tlai dar 2:00-ah inkhel pawimawh leh hmuhnawm Mizoram Vs Manipur

Minute 180 khelh turah minute 90 khelh tawh niin goal a la lut lo. Vawiin tlai dar 2:00 hian Mizoram leh Manipur te minute 90 khelh hmabak khel turin Lammualah an inhmachhawn dawn. Goal khung tam zawkin Nagpur-ah Santosh Trophy final round an khel ang.

Judgement Day

2014 Santosh Trophy-ah Mizo-ram an champion a, kum hnih a ral leh meuh chuan Mizoram football teamin National Games-ah a vawi khat nan gold medal an dawng a, MPL club Aizawl FC-in India ram chhung club football-a inelna sang ber I League an khel ta bawk.

Mizoramin Santosh Trophy-ah I league player 42 a neihte an chhawr theih loh avangin hmasawnna hi fiahnaah a ngaih theih a, fiahna erawh a har ber chi a ni thung.

Tun ṭuma Manipur team hi kum hnih liam taa Mizoram team nen khan khaikhin theih tak a ni. Manipur hian I League club an nei lo a, an club ṭha NEROCA FC-in tun season I League Second Division-ah final round an lut. Hei bakah hian tun hnaiah Manipur State League-in nasa takin hma a sawn bawk.

Manipur team hian Santosh Trophy final round khelh ngei tumin an state league-a player ṭha bakah Indian Super League khelte l;eh i league player hluite an rawn hruai a, team ṭha an ni.

Minute 90 kha

Zirtawpni chawhnu inkhel thlirlet chuan hun tawp lama goal chance ṭha tak tak kha mit thlaah a la cham a, vawiin lam inkhela attacking football an chhawm nung zel a nih chuan inkhel a hmuhnawm khawp ang.

Manipur team-ah an tlarhnung an langsar a, ISL-a Pune City tana khel keeper Lalit Thapa-a'n thawh khatnaah inkhel result a thlak danglam.

Defence laia ISL player pahnih Govin Singh leh Jibon Singh ten inrintawkna an ngah a, a bik takin no. 2 chuanna jersey hatu Govin Singh a ṭha hle. Left back-ah captain Raju Mangang a khawng ṭha viau a, right back Md Sohail Shah che ṭha lo mah se ball a vawm nat avangin a hmuhnawm hranpa hle.

Manipur midfield erawh an khelh dan aṭangin fakna tur an tlem a, winger pahnih Robinson Singh leh Anandkumar te'n Mizoram wing back an tibuai meuh lo. Midfield laia awm Imran Khan-a'n a theihna a la pho chhuak lo a, goal khung theihna tur a hlah. Manipur club TRUGPU midfielder Sangkar Singh-a'n freekick a pet thiam a, tlarhnung a pui ṭha bawk.

Mohammedan forward Pri-tam Singh-a'n tihsual a ngah a, a kawppui Seikhohao Tuboi-a'n tun hma pha tawh lo mah se Shillong Lajong forward hlui hi a la hmuhnawm hle.

Mizoram player-te'n mikhual lakah mualneitu an ni tih an lantir a, duhthusam la ni lo mah se an khel ṭha thawkhat hle.

BVT keeper Lalremruata'n match pawimawha Mizoram tana a ven hmasak berah goal ngei tura ngaih a dang. Wing back-ah Lalrosanga leh Ramfangzaua te'n an hna an tlin a, captain Lalrinchhana leh MS Dawngzela te defence laiah an inkawp fuh bawk.

ONGC midfielder Lalmuanpuia a hmuhnawm a, ani hi Mizoram khaipa niin hun tawp lama winger anga an chhawr hnuah pawh a la che ṭha hle.

Defensive midfield-ah V. Lalṭanpuia ṭum dang ang bawkin a rintlak a, Police lama Ṭ-a khelhpui winger Lalfakzuala erawh a la khel ṭha tawk lo. BVT winger Laldingngheta'n a tlan chakna hmangin Manipur tlarhnung a tibuai a, striker che rang MS Dawngliana'n midfield-a khelh a harsat a, forward mal tlat Malsawmfela'n bul ṭan ṭha lo mah se second half-ah erawh Ma---nipur tlarhnung a tibuai hneh hle.

Inkhel vawi khatnaah Mizoram lamin an ball hman NIVIA Antrix an sawisel a, Manipur lamin Lammual 'artificial turf' leh an khaw lama an turf thar a danglam nasat thu an sawi. Chhuanlam nei ve ve team pahnihah Mizoram an chungnung zawk hret a, goal khung theihna hun ṭha an hlah avangin an hmabak a hau tak sawt ang.

Mizoramin match hmasa lama an chhawr theih loh R. Laldanmawia leh Lalramtharmawia te an la hmang thei dawn lo a, player dang erawh an dam ṭha. Mizoram coach HC Zarzoliana chuan, "Kan chak ngei theih ka ring a, chumi tur chuan mipui puihna pawh kan ngen e," tiin mipui pawimawhna a sawi lang.

Ṭan rual hun

Inkhel thawh khatnaah Lammual khat zo mipui an pungkhawm lo a, thawh hnihna erawh a hmawr bawkna tur a nih tawh avangin Manipur player-te tana zamna tham mipui pun-khawm a ṭul tawh.

Kum 2014 khan Mizoramin Santosh Trophy champion turin Manipur hi Lammualah an lo hneh tawh a, khelmual chhunga hlawhltinna nei turin Mizo mipui
ṭawiawmna a ṭha tih zep rual a ni lo.

Santosh Trophy inkhel en man hi Rs 30 a ni a, Mizoram tan leh inkhel hmuhnawm en tur chuan Mizo mipui nawlpui tan lei ngam a ni.

Vawiin hian Mizoramin a vawi hnih nan Manipur an hmachhawn dawn a, hnam anga Mizo mipui ṭanrual hun chiah a ni.