FIFA-in MFA tlawh, Mizoram football dinhmun an zir
Inrinni khan khawvela football thu-neitu lû ber FIFA ai-awhte leh Mizorama football buaipuitute chuan, Tourist Lodge, Aizawlah Zoram football hmasawnna tur an sawiho.
Tute nge tel?
FIFA aṭangin Mike Pfister, Asia-a FIFA se-nior development mana-ger leh Dr. Shaji Prabhakaran, South & Central Asia FIFA deve-lop-ment officer te an rawn tel. Mizoram Foot-ball Association (MFA) hruai-tute bakah Sports & Youth Services Department, Mi-zoram State Sports Coun-cil, School Education De-partment, District Football Association, MPL Club te, sponsor te, football coach te leh MFA hnuaia committee peng hrang hrang aiawhte nen FIFA aiawhte hian inkawmhona hun ṭha tak an nei a ni.
Mizoram kal chhan
FIFA Under 17 World Cup chu nakkum hian India-in a thleng dawn, World Cup thlengtu tur India rama state parukte bakah Mizoram hi vulh bik turin a thlang.
FIFA chuan MFA hnenah marketing officer leh technical officer pakhat ve ve a pe. Anni hi FIFA in training lo pe tawhin chumi zulzui chuan Mizoram football dinhmun chu kawng hrang hranga chawikang turin hma an la dawn. An hmalakna te rawn thlithlai tur leh engtin nge chak zawka hmalak a nih theih ang tihte FIFA hotute hian an rawn buaipui a ni.
FIFA thu leh hla
Mike Pfister chuan, "Technical lam hmalakna rah chu Marketing lam tana hralh chhuahtlak a ni tur a ni," a ti a. Chumi tihhlawhtling tura football a inhnamhnawih peng tin ṭanrualna pawi-mawhzia a sawi.
FIFA hotupa chuan football hi TV a kan hmuh ṭhin player thiam leh lar tak takte chauh a ni lo, hlawhtlinna leh hmasawnna inṭanna chu a chunglamah ni loin, a hnuai lam aṭangin a ni zawk tih a sawi.
Football-ah chuan hmun sang leh changkang ber berah hlawhtlinna a inṭan lo a, khawi hmunah pawh hlawhtlinna a awm a ni, a ti a. Africa ram rethei tak takah pawh naupang tê aṭanga patling pui pui-in zing varṭian atanga kawt-thlera football an khelh thu leh, chutiang zinga mite chu nitin hian player ṭha tak tak Europe-ah te an rawn lan nawlh nawlh thu a sawi.
National football in hma a sawn dawn chuan State Association in hma a sawn a ngai tih sawiin, State Association pawh District te leh a thawhpui hrang hrangte hmasawnnaah a innghat tih a sawi.
Kawtthlera inkhelh, Street football kan tih, nuam ti taka naupang leh thalaiten, mi tam berin an khelh phaka football hun hnaih hi football chawisanna ṭha ber nia a hriat thu a sawi bawk.
German coach lar Otto Pfister-a fapa Mike chuan, "Mi tam ber chuan football han tih hian Beckham te, Ozil te angte hi kan mitthla nghal ngawt thin a, mahse khawvel pum han thlirin anni anga lar leh thiam hi chu tlem te an ni. Football hi mipui mimir infiamna a ni a, 99% aia tam hi amateur player an ni," a ti.
"FIFA-in football kan thlir dan chu a khelha khelh ringawt hi a ni lova, kum 80 i nih hnuah pawh i la en thei tal a, chu chu football a i inhnamhnawihna a la ni tho mai. Sumdawnna lama kan thawhpuite pawh an tel ve vek a, hlawh phut loa inpete pawh an tel a, zirna in hrang hrangte pawh an tel ve a, ram aiawha inkhelten hlawhtlinna an neih changin sorkar hotute pawh an lo lawm ṭhin...khelmual chhunga pla-yer 11 te chauh hi kan ngaihsak bik tur a ni lo a, kan ngaihtuahna hi a zau hle tur a n," tiin Mike Pfister chuan a sawi
Dr. Shaji Prabha-karan chuan Mizoram chu India rama football in pui ber a nih tawh thute, state dangte entawntlaka football a ṭhan thute, sorkar leh football association an thawhho ṭhat thute leh sorkarin football khemual ṭha a siam lawmawm a tih thu a sawi a; MFA tana artificial turf FIFA-in a pek chu kumthar january-ah hman theiha peih fel a beisei thu a sawi.
Sawi hona hlawk
Mizorama a vawi khatna atan FIFA Stakeholders Consultation Meeting neih hi Inrinni zan dar 10 dawn thleng kalpui a ni a, a telte'n an kham lo tlangin hlawkpui an inti hle.
Sorkar aiawha thusawitu lamin SYS leh MSSC kalphung leh football atana an thawhhlawk dante FIFA hnenah an hrlhfiah a, SSA -in football academy an kalpui tum dante an sawifiah bawk.
District FA lamin district-a harsatna an tawhte leh an thlirna hrang hrang an sawi a, club aiawhte leh coach aiawhte bakah football chhungkuaa mi pawimawh hrang hrangte'n thu an sawi.
MFA technical officer Danny Lalduhawma leh marketing officer Mark Lalduhsaka-te hnen aṭangin an hnathawh tawh leh kal zel dan tura an ruahmannate ngaihthlak a ni a, sawwiho zui a ni.
Sports minister nen
FIFA aiawhte hian nimin khan sports minis-ter Zodintluanga chu a inah hmuin, Zoram football dinhmun chawikang tura FIFA hmalak tum dan hrang hrang an sawipui a. Zodintluanga chuan FIFA hmalakna chu lawmawm a tihziate lo hrilhin, state sorkar in Mizoram FA a thlawp ṭhat zia te, khawtinin khelmual ṭha neih an duh thu te a lo hrilh a, football-a Zo-fate tuihalna phuhru tura sorkar hmalak mek dante pawh a lo hrilh a ni.
South Asia-a FIFA aiawh Dr. Shaji Prabha-karan chuan football hian khawtlang nunah nghawng tha tak nei se an duh thu leh, sum leh paia hlawkna chauh FIFA in a ngaihtuah ber loh thute a sawi a. Mizoram football vanneihna pakhat chu sorkarin State FA a pui
ṭha em em mai hi a ni tih a sawi bawk.
MFA khelmual
Sairang Dinthara MFA khelmual, FIFA-in artificial turf a rawn phahna tur hmun chu nimin khan FIFA hotu pahnihte hian an haw pahin an tlawh nghal a. Sairang Dinthar khawtlang hruaitute'n FIFA aiawhte hi an lo dawngsawng a, MFA hruaitute nen khelmual hi an fang a ni.