Stamford Bridge-ah City an mualpho

Manchester City manager Manuel Pellegrini-a'n Chelsea nen FA Cup fifth round an khelh hmain Nilainia Dynamo Kiev nena Champions League last 16 an khelh tur a ngaih pawimawh zawk thu a sawi a, Chilean manager hian a thusawi dik zia tihlan nan Pathianni zan khan Stamford Bridge-ah naupang rual a hruai.

Mualneitu Chelsea player-te'n a naupang zawk hlah thlem an tum lo a, Stamford Bridge-ah City rawlthar rual 5-1 in an mualpho a, FA Cup quar-terfinal-a Everton hma-chhawn turin Chelsea an in pet tling chiang hle.

Inkhel chu

Chelsea-in inkhel ṭan aṭanga minute 35-naah goal an khung a, goal khungtu chu Guus Hiddink hnuaia harhtharna chang mek Diego Costa a ni.

Blues lawm chhung erawh a rei lo. Minute hnih a liam hman chauh tihin City-in an chhanglet ve lehnghal a, nikum nipui transfer-a Ligue 2 club Lens aṭanga City zawmtu David Faupala chuan a club thar tana a match hmasa berah goal a khung.

Goal dang lut loin chawlhlawk hman a ni. Minute 48-naah Chelsea-in Willian hmangin an goal hnihna an khung a, an hawikir tawh lo. Defender Gary Cahill, khel ṭha em em mai Eden Hazard leh Bertrand Traore-te'n goal khat
ṭheuh an khung leh a, Chelsea-in 5-1 in hnehna an chang.

Pellegrini thukhawchang

City boss Manuel Pellegrini chuan, "Kan hma lawkah Champions League inkhel a awm avangin team naupang zawk thlan mai loh chu tih theih kan nei lo a, FA Cup-a kal zel hi a harsa dawn tih ka hre lawk a ni. Player inhliam sa paruk kan nei a, risk ka la ngam lo a ni," tiin player naupang zawk a chhawr chhan a sawifiah.

Spurs an tlawm

Premier League lama che ṭha tak Tottenham Hotspur-in an chet ṭhat FA Cup lamah an chhawm thei lo a, Crystal Palace lakah 1-0 in an tlawm.

Crystal Palace tan Liverpool defender hlui Martin Kelly chuan he inkhela goal awmchhun hi a khung a, November 2011 hnua a goal khung hmasak ber a ni.

Spurs tan Harry Kane-a goal shot ṭha tak tak chu Palace keeper Wayne Hennessey-a'n ṭha tak takin a dan sak a, London club rawlthar duhawm Dele Alli chuan post a pet per bawk.

Crystal Palce tan kum 1995 hnua FA Cup quar-terfinal an luhna hmasa ber a ni a, quarterfinal-ah Championship club Reading an hmachhawn dawn avangin semifinal luh chance an nei sang hle.

Hammers an ropui

Chelsea ropui zanah London club dang West Ham pawh an che ropui a, Hammers hian an mikhualna ramah Blackburn Rovers chu 5-1 in an sawp.

Championship club-in Ben Marshall hmangin goal hmahruai khung mah se Hammers-in Victor Moses hmangin an chhanglet thuai a, tun hnaia contract thar ziaktu Dimitri Payet leh January transfer-a Upton Park pantu Emmanuel Emenike-te'n goal hnih ve ve khung bawkin West Ham an chak chiang hle.

Kum 36 chhung nomawi liantham la chawi lo West Ham hian quarterfinal-ah nizana Shrewsbury leh Manchester United inkhela chak zawk zawk an hmachhawn ang.

FA Cup quarterfinal fixtures, March 12

Reading 08:30 Crystal Palace

Everton 08:30 Chelsea

Arsenal / Hull City 08:30 Watford

Shrewsbury Town/Man United 08:30 West Ham