East Bengal an chak; Lajong an chak zo lo

Pathianni zan I League inkhelah East Bengal chuan 2-1 in an mikhual Salgaocar FC an hneh a, league table-ah pahnihna dinhmun luahin champion beiseina an la chhem nung ve zel.

Shillong Lajong chuan khualmualah DSK Shivajians chu goal khat ve ve khungin an inhnehtawkpui bawk a, season thara I League khel chhunzawm turin Shillong club dinhmun a him rih hle.

East Bengal vannei

Barasat Stadium-a inkhelah East Bengal-in inkhel an thunun a, inkhel ṭan aṭanga minute 9-na leka France international hlui Bernard Mendy goal shot chu Goan club keeper Karanjit Singh-a'n a dang ṭha hle.

Mendy-a hmuh chhunzawm a, minute 38-naah Mohammed Rafique tan ball ṭha tak siam sakin kum 23-a upa midfielder hian a hlah lo.

Coach thar Santosh Kashyap hnuaia hmasawn Salgaocar-in an si phurh sut ngei tumin theihtawp an chhuah a, minute 65-naah an thawhrim rah an hmu. Scottish striker Darryl Duffy-a'n an si phurh sutna goal a khung a, Swansea striker hlui hian league match riat a inlanah goal riat a khung ta.

Hun tawp nan minute sarih chiah a awm tawh tihin Kolkata club an vannei a, Bello Razaq chuan an goal hnihna a khung. Goan club tan sutna hun a awm tawh lo a, East Bengal-in 2-1 in hnehna an chang.

East Bengal tan Mizo tlangval S. Malsawmtluanga leh Robert Lalthlamuana-te squad-ah an hmel hmuh tur a awm lo.

Lajong-te inhnehtawk

Shree Shiv Chhatrapati Sports Complex, Pune-a inkhelah Shillong Lajong leh DSK Shivajians-te 1-1 in an inhneh-tawk a, minute 2-na leka Lajong tana Brazilian striker Uilliams-a goal khung chu mualneitu team tan Cameroon striker Asier Dipanda chuan minute 60-naah a sut a ni.

Shillong club tan Samuel Lalmuanpuia leh Zodingliana Tochhawng ten inkhel bul an ṭan a, second half-ah Jacob Lalrawngbawla'n Samuel-a hi thlakin khelmual chhungah a tlan lut bawk.

Pune club tan Zohmingliana Ralte leh Zohmingliana Ralte-te chu tlarhnungah an inkawp bawk a, minute 90 chhung an khel tluan ve ve.