India captain hoin Khatla TBL
Mizoram Super League champion lai Khatla TBL chuan India captain Vishesh Bhriguvanshi hoin MSL2 an khel dawn a, an match hmasa berah Ningani zan dar 8:00 hian Hawla Indoor Stadium, Republic Vengthlangah Chaltlang Ryders nen an inhmachawn ang.
TBL hian MSL1-ah hnehsawh takin champion nomawi chawi mah se nikum kum tawp lam khan Marova Memorial Basketball Tournament final-ah an elpui Zarkawt BCA an hneh lo. MSL2-ah an nomawi humhim ngei tumin feet 6 leh inches 4-a sang India captain Vishesh bakah an hmanthiamsa small forward Pratham Singh an nei leh dawn bawk. Singh hi India tan pawha lo khel tawh a ni.
Inbuatsaihna
Nomawi humhim ngei tumin TBL hian Janury thla aṭang khan Hawla Indoor Stadium leh Chawnpui-ah te ngawrh takin inbuatsaihna an nei mek a, tun dinhmunah player 15 an ziah luh zingah hliam leh harsatna nei an awm lo.
Mapuia hoin
MSL1 Most Valuable Player H Laldinsanga chu TBL innghahna leh hmachhuan a ni leh dawn a, Saron Veng tlangval hian season hmasa khan point 143 score-in assist vawi 14 a nei bawk a ni. TBL hian City Police-ah an player pawimawh pathum Gospel Lalthawmmawia, R Lalmalsawma leh Nelson Lalrohlua te an chhawr thei tawh dawn lo. Mahse, TBL hian season hmasa a che ṭha tak mai small forward Vanlalmuana an la kawl avangin point score an harsat lo tura ngaih a ni.
TBL point guard Mapuia chuan, "Mizo mipui ten India ram pum huapa player langsar inkhel lai live a an en thei tur hi a lawmawm hle. Kan champion nomawi humhim leh ngei tumin kan inbuatsaih ngawrh a, a hlawhtlinna pawh hmuh ngei kan beisei," tiin Vanglaini palai a hrilh.
KHATLA TBL
Sl. No. Name Address Jersey No Position
1 H Laldinsanga Saron Veng 7 PG
2 Vanlalnunsanga Khatla 8 SG
3 Julian Lalramdinthara Mission Vengthlang 13 C
4 Vanlalmuana Dawrpui Vengthar 23 SG
5 Lalrinzuala Dawrpui Venghar 39 PG
6 Jacob Laldinliana Tuikual North 15 PG
7 Lalrinpuia Hlondo College Veng 27 SG
8 Eddie Zaithanmawia Khatla 35 PF
9 Andrew Lalmalsawma Republic Veng 10 C
10 David Lalrinchhana Tlangnuam 79 C
11 Pratham Singh Uttar Pradesh 25 SF
12 Vishesh Bhriguvanshi Uttar Pradesh 9 SF
13 Jordan Lalchhanhima (U-18) Khatla 24 SG
14 R. Lalmalsawma Tuikual North 21 SF
15 Gospel Lalthawmmawia Khatla 22 SF
15 H Laldinsanga Saron Veng Coach
16 Vanlalnunsanga Khatla Asst Coach
17 Lalawmpuia Pachuau Khatla Manager