Champion tum ngam Zarkawt BCA

23rd February, 2016

Mizorama Basketball inelna lian ber Mizoram Super League chu Ningani aṭangin khelh a ni dawn a, season hmasaa pahnihna Zarkawt BCA chuan an match hmasa ber atan Zirtawpni zan dar 8:00 hian Zarkawt Serpents an hmachhawn dawn; Zarkawt derby kan hmu nghal dawn a ni.

Zarkawt BCA hi nikum Novem-ber thla khan Khatla TBL hnehin Marova Memorial Basketball Tournament-ah an champion a, Mizoram Super League season 2-ah pawh champion leh tura rinkai zinga mi an ni. MSL1-ah khan BCA hian final lut mah se TBL an hneh loh avangin pahnihnaah an lungawi a
ṭul, kuminah erawh hmasawn an tum.

BCA hian MSL1-a assist vawi 17 nei thei point guard Michael F Lalawmpuia an nei a. Ani bakah hian small forward David Lalruatfela an la neih bawk avangin team ṭha an la ni.

Tun hma

Kum 2010 khan Zarkawt BCA hi din a ni a, third division aṭanga bul ṭanin MBBA hnuaia inelna hrang hrangah vawi sarih an champion tawh a, final vawi 11 zet an khel tawh nghe nghe. Kum 2014 aṭang khan first divison club-ah inhlangkaiin MSL1-ah khan match 10 an khelh aṭangin vawi sarih hnehna an chang thei a, vawi thum an tlawm thung.

Inbuatsaihna

Kumin January thla tir aṭang khan BCA hian tlai lamah darkar hnih practice an nei ṭhin a, tun dinhmunah season hmasa ai khan player fitness a ṭhat zawk avang leh hliam an neih loh avangin beiseina an nei sang hle. Zarkawt Club hian MSL2-ah hian fans tan jersey an siam hran dawn lo a, T-Shirt an siam thung dawn a ni. Hotel Regency bakah Inkspot Digiprint Solution leh BCA communication hnen aṭangin sponsor an hmu.

BCA coach R Liansangpuia chuan, "Kan inbuatsaihna leh thawhhona a ṭha a, theih tawp kan chhuah leh dawn avangin MSL1 ai chuan kuminah hian beiseina kan nei sang zawk. Veng mipui te an phur tawh a, anni min puihna zarah champion ngei kan tum," tiin Vanglaini palai a hrilh. Dinthar coach hian Marova Memorial final-a TBL an hneh theih nana fan-te ṭangkaizia a la theihnghilh lo chiang hle.

Zarkawt BCA

Sl. No. Name Address Jersey No Position

1 Lalremsanga Ramthar 17 PG

2 Albert Lalchhuan Tuikual South 8 SF/PF

3 David Lalruatfela Armed Veng 77 PF/SF

4 Lalpekhlua Chhinga Veng 22 PG

5 Michael F Lalawmpuia Ramhlun North 1 PG

6 Jackson Lalrintluanga Chawnpui 3 PF

7 Malsawmtluanga Zarkawt 33 SG

8 HT Vanlalremruata Dinthar 13 SG

9 Lalṭanpuia Mission Veng 7 PF

10 Henry Lalramngaihawma Zarkawt 23 SF/SG

11 Zorinsanga Ramthar 11 SF/SG

12 Paul Vanlalnghaka Ramhlun North 47 SF

13 PC Lalmuansanga Ramhlun North 12 C/PF

14 Mathew Remtluanga Sailo Zarkawt 10 C

15 R Liansangpuia Dinthar Coach

16 Lalruatfela Dawrpui Asst Coach

17 Malsawmtluanga Zarkawt Manager