Real chak zawh loh zanah Ronaldo-a che fuh lo
Pathianni zan khan La Liga inkhelah Real Madrid forward Cristiano Ronaldo-a'n penalty a pet goal lo a, an mikhualna ramah Malaga nen 1-1 in an inhnehtawk.
Real Madrid-in chak result an hlawhchhuah zawh loh avangin hmahruaitu Barcelona nena an inkar hi point kua laiin a zau ta a, pahnihna Atle-tico Madrid-in Villarreal an inhnehtawkpui bawk avangin Pathianni zan La Liga inkhel result hi hmahruaitu Barcelona tan chanchin lawmawm a ni.
Valencia manager Gary Neville-a'n a naute hnehna a chanpui leh ta a, a zawna match thum hnehna an channa ni turin khualmualah Granada chu 2-1 in an hneh.
Ronaldo a vannei
La Rosaleda Stadium-a in-khel-ah mikhual team Real an che nawi a, beisei loh zawk Malaga-in inkhel an thunun. Spanish club lian tan goalkeeper Keylor Navas-a'n a hna a tlin a, Malaga tlarhmate hlauhawm ṭhin viau mah se vawi tam a ti beidawng.
Minute 33-naah khel ṭha lo zawk Real-in goal an khung a, goal khungtu chu Ronaldo a ni. Tun season-a a goal 34-na khungtu Ronaldo goal hi chiang takin offside nimahse assistant referee-in a phar lo miau a, goal-ah pawm a ni.
Malaga khelh ṭhat chhun-zawm mah se Ronaldo-a'n first half-ah a phakar a chhuah a, Malaga defender Weligton Oliveira nen ball an inchuhna lamah tlu derin penalty a hlawh chhuak.
Mahse, Malaga tlarhma chet ṭhat tluk zetin goalkeeper Carlos Kameni a che ṭha a, Cameroon in-ternational hian ṭha takin Portugal captain penalty hi a dang.
Mualneitu Malaga a hnual phah lo. Real goal an nawr chhun-zawm a, minute 66-naah goal an hlawh chhuak ta nge nge. Ven loha awm Raul Albentosa-a'n mualneitu team tan a khung a, hun tawp thleng goal dang a luh tawh loh avangin team pahnih hi 1-1 in an inhnehtawk.
Real tlarhnung
Real Madrid-in tlarhmaah hliam vangin Karim Benzema leh Gareth Bale an chhawr thei lo a, tlarhnungah hrem vangin Raphael Varane a inlan thei lo bawk.
Madrid khaw club buaina erawh tlarhma niloin tlarhnung an ni a, Malaga tlarhma lakah an talbuai ṭhin hle.
Real tlarhnung chet chhiat thup turin goalkeeper Keylor Navas erawh a khel ṭha a, Costa Rican keeper hian Juanpi, Duje Cop leh Ricardo Horta-te goal shot chu ṭha takin a dan sak a, Malaga khelmualah Real tan point khat a hlawh chhuah sak.
Atletico chak lo
Real Madrid chak zawh loh zanah Madrid khaw club dang Atletico Madrid-in chak result an hlawh chhuak zo bik lo a, khualmualah Villarreal nen goal khung loa an inhnehtawk avangin hmahruaitu Barcelona an phak lohna chu point riat lai a ni ta.
Atletico Madrid manager Diego Simeone erawh a la beidawng lo. Argentine coach chuan, "Ka tumah kan rilru kan pek phawt chuan hma kan la sawn zel thei tih ka chiang a, season tawp thlengin game hi a harsa dawn tih kan hria a ni. Chak result hlawh chhuah ngei duh mah ila Villarreal hi team ṭha tak an ni a, a harsa a ni," tiin a naute a dem lo.
Valencia an chak
League match-a chak result a hlawhchhuah theih loh vanga Valencia fan-te huat rawn Gary Neville-a'n fan-te lawmna a siam chho mek zel.
Kar hmasa lawkah an league match-a chak hmel hmasa ber a hmuhpui hnuin Europa League-ah 6-0 in Rapid Vienna an sawisa a, Granada lakah 2-1 in hnehna a chanpui leh ta.
Valencia tan Daniel Parejo leh Santiago Mina-te'n goal khat ve ve an khung a, Granada tan injury time-a Edgar Mendez-a goal khungin awmzia a nei thui lo.