FA Cup replay awm tawh lo mai thei

England rama football club-te inelna ngaihhlut hlawh tak FA Cup chu replay khelh a ngai tawh lo mai thei. Premier League club lian-te chuan match khelh tur an ngah lutuk avang hian Europe khaw-mualpui inelnaah an tih ṭhat theih loh phah niin an ngai a ni.

England ramah hian league match bakah FA Cup leh League Cup a awm a, FA Cup bikah hian an inhnehtawkin replay khelh ṭhin a ni a, League Cup bikah hian semifinal chinah double leg-a khelh a ni. Football Association chuan player-te an in-khelh hnem lutuk avang hian Eng-land chu nipui tournament-ah a chet ṭhat theih loh phah niin an ngai bawk.

FA Cup replay chungchang hi tun hnaiah ngaihtuah ni mah se thai bo a nih pawh in TV broadcast deal avangin kum 2018 aṭang chauhin an hmang ṭan thei dawn a ni.

Hetihlai hian FA Cup replay hi thaibo a nih chuan league hniam lama club-te'n an tuar dawn tihna a ni a, club tenaute hian Premier League club lian an hmachhawnin ticket man aṭang ringawt pawhin sum tam tham tak an lakluh theih phah ṭhin a, an tan chuan a hlu hle.

FA lam erawh chuan sum chu a inrualkhai thei ang bera kalpui zel a nih tur thu an sawi a, tun season ringawtah hian pound makatduai 13 chu prize money leh broadcast fee-ah an sem ral tawh a ni.

League One club FA Cup fifth round-a Manchester United hma-chhawn tur Shrewsbury manager Micky Mellon chuan, "Replay khelh hian keini ang club tenau tan sum a siam a, club lian hmachhawn chance hi nei ṭhin lo ila chu keini ang club tan chuan dinchhuahna chance hi a tlem em em a, club lian hmachhawnna hun ṭha kan neih
ṭhin avangin sum tam tak kan hmuh theih phah a ni," a ti.

Liverpool boss Jurgen Klopp chuan England rama domestic cup match khelh tur tam lutuk chu a lo sawisel tawh a, England team-in an chet ṭhat theih loh phah niin a sawi. German manager hian Premier League-in thlasik chawlh an nei ve lo chu Europe inelnaah English club-te an chet ṭhat theih loh phah niin a lo sawi tawh bawk.

Hetihlai hian Manchester City chuan Champions League last-16 match an khelh hma ni thuma FA Cup fifth round-a Chelsea an hmachhawn a ngai chu an lungawi loh thu an sawi.

Season thar aṭanga Pep Guar-diola enkawlna hnuaia khel tur City hian February 21-ah Stam-ford Bridge-ah Chelsea hi an hmachhawn ang a, ni thum hnuah Dynamo Kiev chu khualmualah an luhkhung leh dawn a ni.