Dzeko goal hmangin Roma-in Palermo an sawp

Pathianni zan Italian Serie A inkhelah AS Roma chuan an mikhual Palermo chu 5-0 in an sawp a, Manchester City striker hlui Edin Dzeko chuan goal hnih a khung.

An coach Luciano Spalletti chu mipui vantlang hriatah mawi lo taka a sawisel avangin captain Francesco Totti chu squad-ah telh a ni lo a, mahse Roma hian goal khung an harsat lo hle. Dzeko leh Mohamed Salah ten goal hnih an khung bakah Seydou Keita chuan goal khat a thawh ve bawk.

Roma hian season thara Cham-pions League khelh an beiseina an chhem nung zel a, point 50 hmuin Inter Milan an lehpel leh chiah a, leage table-ah palina dinhmun an luah chho leh rih a ni.

Roma coach Spalletti chuan, "Indopui hnuah chuan Totti hi khawvela player ṭha ber a ni a, zah pawh a phu hle. Mahse, manager ka nih avangin club dan leh hrai-te ka zawm tur a ni thung. Squad-ah telh ni lo mah se club a kalsan theih loh avangin stadium chhungah pawh a rawn kal a, ṭha takin team training pawh a zawm zui ang" tiin a sawi.

Kum 39-a upa Totti hi Roma chanchina player ropui bera ngaih a ni a, kum 1992 aṭang khan a club tan hian match 593 a khel tawh a ni.