Kyrgios-a'n ATP title la ve ta

Australian tleirawl bei-sei-awm zinga mi Nick Kyrgios chuan a vawi khat nan ATP title a la ve ta. Pathianni zan khan 2014 US Open champion Marin Cilic hnehin Marseille Open-ah a champion a ni.

Kum 20-a upa Kyrgios hian final inkhelah vawi 17 ngawt ace a vaw chhuak thei a, seeded pangana lakah 6-2, 7-6 in hnehna a chang. World number 32 Kyrgios hian Marseille Open-ah hian set a hloh miah loh bakah a service a hum vek.

Kyrgios hian Wim-bledon leh Australian Open-ah te quarterfinal a lo lut tawh a, nikum khan Estoril Open final a lo lut tawh bawk, mahse tun hmain champion nomawi a la chawi ngai lo.

Kiu na vanga hliam dam hlim Kyrgios chuan, "Hliam vangin kar hnih ka inkhel thei lo a, hetiang taka ṭha hian ka lo kir nghal ka beisei lo. Nikumah a vawi khat nan final ka khel a, kuminah title hmasa ber ka la bawk. Hlim takin hma lam hun ka thlir zel ang," tiin a sawi.