North East aiawh tur Mizoram

2016 Santosh Trophy Qualifier-ah Mizoramin fiahna hautak an hmachhawn a, Malsawmfela goal hmanga Manipur hnehin North East aiawhin final round an khel dawn.

Mizoram leh Manipur te'n goal awm loa an intawnna hmasa an ṭin hnuin nimin khan Lammualah a ṭum hnih nan an intawng leh a, minute 180 khelh zawhah inelna thlengtu 1-0 in an chak. Hun tawp thlengin inkhel boruak a sang a, tharum hman tamna inkhelah Mizoram player-te an huai zawk a, 2014 champion-in inkhel entu mipuite aṭangin ṭawiawmna an dawng ṭha hle.

Tu nge inlan?

Mizoram coach HC Zarzoliana'n goalkeeper inhliam H. Lalremruata aiah veteran keeper Vanlalhriata a luhtir a, player dang erawh a thlak lo. Defence-ah Lalrosanga, Lalrinchhana, MS Dawngzela leh Ramfang-zaua te an awm a, midfield-ah Lalfakzuala, Lalmuanpuia, V. Lal-
ṭanpuia leh Laldingngheta te awmin forward-ah MS Dawngliana leh Sawmfela te an inkawp.

Manipur coach Dhonen Singh-a'n player pakhat tho a thlak a, right winger Robinson Singh aiah David Ngaihte luhtirin midfield dang pathum Anandkumar, Imran Khan leh Sangkar Singh ten an position ngai
ṭheuh an luah. Tlarhmaah Pritam Singh leh Seikhohao Tuboi te inkawpin tlarhnungah keeper Lalit Thapa pui turin Raju Mangang, Jibon Singh, Govin Singh leh Sohail Shah te defence-ah an intlar.

Sawmfela a ni tlat

Ṭan phat aṭangin Mizoramin an nawr nghal a, Dingngheta'n minute khatna lekah a hlah nghal a, hemi hnu lawk hian David Ngaihte-a'n Mizo defender kut a tauh perah inngai mah se referee Panda-a'n Manipur winger ngaihdan a ṭawmpui lo.

Goal chance an inneih chhawk a, Manipur keeper Lalit Thapa-a'n box pawna a man vangin freekick a chawi a, Muanpuia'n wall a pet per a, hemi hnua an freekick hmuh Zautea'n a pet a, BVT wing back hian a pet na lutuk bawk.

Manipurin chance ṭha an nei hmasa zawk a, Hriata'n Manipur midfielder Sangkar Singh-a freekick pet a man ngheh zawh loh avangin Anandkumar-a'n Mizoram goal zawnah a pet nawn leh sak a, Mizoram Police keeper Hriata'n a dang ṭha hle. Minute 15-naah captain Rinchhana tihsual vangin Tuboi-a'n goal khung ngei theihna tur chance a nei a, veteran striker hi a muan hret avangin Notea'n a tibuai hman.

Mizoram hmatawnga awm Sawmfela'n a chakna a hmang ṭangkai a, Dawngtea erawhin a thiamna a hmang thei lo. Manipur keeper Lalit Thapa-a'n Indian Super League-a a khelh chhan a lantir nawn fo a, darkar chanve hnua Muanpuia ball pet a dan chu ṭha tak a ni.

Minute 36-naah Rosanga thawh ṭhat zarah Mizoramin an nawr let thut a, Lunglei tlangval hian Chanmari FC tana a khelhpui Sawmfela tan ding lam aṭangin ball duhthusam a pe a, Mizoram striker-in chiang zetin a khung.

Goal khat luh hnuah Manipurin chance an nei nghal mawlh mawlh a, Tuboi-a'n keeper chauh a hmachhawn hnuah a khung thei lo a, Imran Khan-a freekick pet Hriata'n a dan sak a, Manipur defender Jibon-a'n goal ban a tauh per bawk. First half-ah Mizoram an him hram.

Chhandamtu Hriata

Second half-ah Mizoramin bul an ṭan ṭha a, first half-a hmuhnawm Sawmfela pui turin Dawngtea a rawn che ṭha tawh a, goal erawh an khung thei lo. Striker pahnih hian wall pass nalh tak hmanga Manipur tlarhnung an ṭhiah hnuah Bawngkawn tlangval Dawngtea'n goal a khung thei lo a, BVT striker hian kawh zetin crossbar a pet per leh a, ball per hi goalline-ah tak a sawt. Mizoram tan winger pahnih Dingngheta leh Fakzuala ten chance ṭha an hlah bawk.

Darkar khat ral hnuah Manipurin goal khung theihna tur chance an nei a, Mizoram box chhung aṭangin goal an pet mawlh mawlh a, referee-in foul a ham ringawt avangin Tuboi a lungawi lo. Shillong Lajong striker hlui hian referee hi nam mah se Odhisa lamchhuak Panda hian red card a pe ngam lo a, hemi hnu hian team pahnihin tharum an hmang nasa lehzual.

Mizoram tan V. Lalṭanpuia a ṭangkai a, Police midfielder huaisen hian Manipur attack tur a dang chat nasa hle. Minute 10 chiah a awm tawh tihin substitute Joseph Lalnunpuia ball pet chu Manipur keeper Thapa-a'n a dang ṭha tawk lo a, a per chu Dawngtea'n a kawppui Sawmfela khung turin a pe mah se assistant referee-in flag a phar hman.

Penalty hruai thleng turin Manipurin goal khat chiah an mamawh a, Sangkar Singh-a'n Mizo defender Notea a paltlang hnuah keeper chauh hmachhawn mah se Hriata apaltlang thei lo. Mizoram tan veteran keeper Vanlalhriata chu chhandamtu a ni.

Eng nge an sawi?

Manipur manager Amutombi Singh chuan, "Ball kan pet kang nasa a, Mizoram lamin ground ball-in an khel thung a, kan tluk lo hrim hrim a ni. Referee pawh mihring tho a ni a, tihsual nei thei a ni a, sawisel tur ka nei lo. Team ṭha zawkin final round an khel dawn a ni," tiin Vanglaini palai a hrilh.

Manipur assistant coach Puthiba Meitei chuan, "Goal khung theihna kan nei a, kan khung lo. Referee khan Mizoram player pathum vel kha red card pe thei a ni a, a pek si loah chuan kan player naupang-te khan an theihna an lantir thei lo. Chutihrualin chak phu zawk chu Mizoram an ni a, keini aiin an ṭha zawk a ni," tiin a sawi.

Mizoram coach HC Zarzoliana chuan, "Han tal buai zeuh chang kha kan nei a, kan khelh dan erawh a lungawi thlak viauin ka hria. Goal tam tak khung lo mah ila kan mamawh tawk kan khung avangin kan lawm hle a ni. Inkhel entu Mizo mipuite chungah kan lawm a, final round atan rim zawkin kan inpuahchah ang," tiin a sawi.

Manipur-in I League club an la nei lo a, tun ṭumah hian I League Second Division final round lut thei NEROCA player-te bakah ISL player-te rawn hruai mah se inelna thlengtu an ngam lo. Mizoramin kum thum a zawna Santosh Trophy final round an khel thei hi hlawhtlinna duhawm tak a ni a, tun ṭum a ropuina bik chu I League club Aizawl FC player tel lo chunga an tlinna hi a ni. Tun hmaa North East state zinga inkhelh thiam ber Manipurin tun hnaia hmasawn Mizoram an chung en ta.