Juventus hmaah Bayern an ding dawn
Zanin dar 1:15 hian Italian champion Juventus chuan Champions League last 16 khel turin German champion Bayern Munich an lo mikhual dawn a, European football ngainatute tan hmaih phal chi a ni lo ang.
Juventus hian an khelmuala Champions League an khelh hnuhnung vawi 34-ah vawi hnih chiah chak loh an nei a (W22 D10), an record hi a duhawm hle. Mahse, an chak lohna match pahnih hi zanina an mikhual tur Bayern lakah ve ve hian a nih avangin ngaihṭha takin an awm bikin a rinawm loh.
Vidal a kir dawn
Arturo Vidal chuan season hmasa khan Juve chu Serie A title a lakpui bakah Champions League final a hruai thleng. Chile international hian nipui transfer-ah German club a zawm thung, zanin hian a club hlui a hmachhawn dawn.
Juve midfielder Paul Pogba chuan, "Arturo hi player ṭha bik a ni a, ball a chan theih bakah goal khung a harsat lo. Bayern hneh tur chuan ani hi hmun awl kan siamsak loh a ṭul ang. Hnehna chang ngei turin kan inbuatsaih a, result ṭha kan neih ngei ka beisei," a ti.
Bayern attack vs Juve defence
Italian club hlun Juve hi tunhma aṭangin tlarhnung khawng ṭha tia sawi ṭhin an ni a, tun hnaiah a zawnin match riat chhung goal an chhuah tawh lo. Serie A-ah goal chhuah tlem ber ni mekin goal 15 chiah an la chhuah a ni. Bayern tana chanchin lawmawm erawh hliam vangin defender pawimawh Giorgio Chiellini an chhawr thei dawn lo.
Bayern hian tun season-ah goal khung an harsat lo a, Bundesliga-ah ringawt pawh goal 56 ngawt an khung tawh. Striker Robert Lewandowski chuan inelna hrang hrangah match 32 aṭangin goal 32 a khung tawh nge nghe.
Hliam leh dam
Juve hian an defender Chiellini chu ke na vanga an chhawr theih dawn loh bakah Alex Sandro leh Martin Caceres te an inlan thei dawn lo. Hetihlai hian Juan Cuadrado leh Sami Khedira te hliam a dam tawh a, striker Mario Mandzukic pawhin a club hlui a hmachhawn theih beisei a ni.
Bayern hian tlarhnungah duhthlan tur an neih tlem lai tak a ni a, defender Holger Badstuber, Mehdi Benatia leh Javi Martinez te an la inkhel thei dawn lo. Mahse, Franck Ribery leh Mario Gotze te hliam a dam tawh avangin Pep Guardiola tan tlarhma lamah erawh buaina tur a awm lo ang.