Arsenal-in Barcelona an el pha?

Spain ramah chuan khawvel player manto awm khawmna Real Madrid meuh pawhin Barcelona an elpha lo. Catalan club hi an dinhmun leh an nomawi kawl mek aṭanga thlirin khawvel team ṭha bera chhal theih an ni. Premier League-ah Leicester City-in hma an hruai a, amaherawhchu tun dinhmuna England team ṭha ber chu Arsenal an ni. Zanin dar 1:15 hian Emirates Stadium-ah football mawi taka khel ṭhin pahnih an inhmachhawn dawn a, Ten Action-ah a en theih ang.

Barca an lian

UEFA Champions League Round of 16 fixtures tihchhuah a nih khan Arsenal chu khingpui atana duhawm loh Barcelona nen pawh fuh an nih avangin inkhelh ṭan hma hauh aṭangin London club hotute an ṭawng fimkhur a, Gunners supporter-te'n quarterfinal thlen an inbeisei lo.

Spanish club lian Barcelona hian kum 2010 leh 2011 khan Champions League aṭangin Gunners hi an lo petchhuak tawh a, 2006 Champions League final-ah an lo hneh tawh bawk. Record thlirin Catalan club an chungnung a, chutihrualin awlsam takin hnehna an chang ngai lo. London-a an intawn hnuhnun ber ṭumin Arsenal-in Robin van Persie leh Andrey Arshavin te goal hmangin Barca hi an hneh a, Paris-a khelh Champions League final-a Arsenal vanduai zia leh Catalan club vanneih zia chu mi nawlpui hriat a ni bawk.

MSN boruak

Lionel Messi, Luis Suarez leh Neymar te hi fak mawi chawp an ni lo a, tun season-a player pathum goal khung zat hi goal 91 niin Premier League-a Leicester City leh Arsenal goal khung belhkhawm aiin goal hnihin a tam zawk. MSN hian season liam ta khan goal 145 an khung a, chu chuan tun season-ah an thlen tur chin an la thleng lo tih a nemnghet.

Argentine forward Messi hian kum 28 leka upa nichungin La Liga-a goal 300 khung tling hmasa ber a ni a, Brazil legend Zico chuan, "Messi hian Pele, Garrincha, Johan Cruyff, Franz Beckenbauer leh Diego Maradona te level a khum chho mek a ni," tiin Barca thiampuipa a fak a, Catalan club chu London leh Nou Camp-a an chak ve ve a rinthu a sawi bawk.

Messi hming ri ring mah se khelmuala thawm nei ber erawh Liverpool player hlui Suarez a ni a, Uruguayan forward hian tun season-ah goal 41 a khung tawh. La Liga leh Champions League-ah Suarez-a'n Barca tan a khung tam fal nalh a, ṭhiante goal khung tur siam sak kawngah chuan Uruguayan forward leh Neymar ten vawi 16 ve ve assist neiin an intluk chiah.

MSN an ṭha a, Barca ṭhatna tak erawh team anga an khelhna hi a ni. Luis Enrique hnuaiah Barcelona-in an ṭhat lai ber hun an hmang mek niin a lang a, Pep Guardiola hun lai ai pawhin an ṭha zawk hiala ngaih an ni.

Laipui a inpeih

Arsenal manager Arsene Wenger chuan, "Tun hi kan tan hun ṭha a ni a, bawhpelh a thiang lo. Attack dan chin tawk kan neih a ngai a, goal venhim hun pawh kan hriat a ṭul. Vawi hnih kan khel dawn a, kan khelmuala kan match khelh tur hi a pawimawh takzet a ni. Barcelona player tin hi mimal anga dan harsa tak vek an ni a, a huhoa kan dan thiam a ṭul dawn a ni," tiin a sawi.

London club hi hun pawi-mawh an tawlh thlu fo a, kar--tawpa Hull City nen FA Cup-a an inhnehtawkte kha chet-sualna chi khat a ni. Cham-pionship hmahruaitu Hull City nen FA Cup replay an khelh a ṭul dawn avangin Wenger-a'n a player-te awmze neia a hman thiam a ṭul dawn a ni.

Gunners-in Hull City an draw ṭumin ṭhiante goal khung tur siam thiam Mesut Ozil chu damlohna vanga an chawlhtir a ni a, Barca an hmachhawn hunah German midfielder bakah Aaron Ramsey, Olivier Giroud leh Alexis Sanchez te starting eleven-ah an rawn kir hmel a, defensive midfielder ṭha Francis Coquelin chhawr theihin a awm bawk.

Arsenal-in season nga chhung chu last 16 an paltlang thei tawh lo a, French manager-in an hun a inher chhuak turah ngai mah se a vawi ruk nan quarterfinal an thlen zawh loh erawh a rinawm zawk. Messi-a'n Champions League-a Arsenal vawi li a hmachhawn tawh-ah goal ruk a khung a, Barcelona tluk pha chiah loa passing football khel ve Gunners hmabak hi a huphurhawm hle.