Gotze a chhuak dawn

Football nipui bazar inhawn hunah Mario Gotze chu Borussia Dortmund aṭangin a chhuak dawn, club sporting director Michael Zorc chuan an forward chhuah tur thu hi a sawi chiang.

Kum 27 mi Gotze hi player ṭha leh theihna nei sang tak a ni a, mahse hliam leh damlohna vangin a nih tur anga sang a ni phak loah a ngaih theih. Dortmund tan hian match 201 a khel tawh, season kal laiah erawh ṭum nga chiah Bundesliga match-ah bul a la ṭan.

Bayern Munich tan pawha khel tawh forward hian German football inelna sang berah hian ṭum nga ngawt nomawi chawi tawhin, 2014 World Cup final khan Argentina lakah goal pawimawh leh hlu bik khungin Germany chu a champion pui.

Dortmund sporting director Zorc chuan, "Nipuiah Mario a chhuak ang, player puitling tak a ni a, club leh mimal inhriatthiam tawnnain thutlukna hi siam a ni," tiin a sawi.  Dortmund manager Lucien Favre-a'n khelh dan phung nghet a siam chho mek a, a ruahmannah Gotze hi a telh lo. Favre chuan, "Tun dinhmunah chuan 3-4-3 formation kan hmang a, Mario tan a khelh dan leh kan kalphung a inrem chiah loh thu ka hrilh," a ti.

Borussia Dortmund-ah Gotze-a'n khelhna hmun chang lo mah se German midfielder hian theihna sang tak a nei - European club lian tam takin an la duh ngei ang.