June 8-ah La Liga khelh theih beisei

Spain prime minister Pedro Sanchez chuan La Liga chu June 8 aṭanga an khelh chhunzawm leh theih tur thu a sawi a, an beisei aia hmain league an chhunzawm thei dawn a nih hmel.

La Liga hi coronavirus vangin March 12 aṭang khan an chawl lailawk, tun thlaltir lam khan league president Javier Tebas chuan June 12 aṭangin an inkhelh chhunzawm leh theih a beisei thu a lo sawi tawh.

Sanchez chuan, "Spain chuan hripui do turin a tih theih zawng zawng a ti a, tunah chuan thil engkim mai hi a eng zawngin a kal. Thil zawng zawng la tih theih loh mah se a ṭha lam a beisei theih ang.

"La Liga pawh June 8 aṭanga khelh theih a ni ang," a ti. La Liga president Tebas chuan sorkar thutluknaah an lawm thu a sawi a, club, player leh coach bakah CSD (National Sports Council) lam thawhrah a nih thu a sawi bawk.

May thlatir aṭang khan player-te chuan mimal training an nei tawh a, tun kar aṭang hian hlawm khatah player 10 aia tam awm loin team training an nei ṭan ang. Training an neih hma hian player-te chu hri an kai em tih endik a ni.

Spanish La Liga hian match khelh hmabak 11 an la nei a, an chawlh lailawk hma khan champion lai Barcelona chuan an elpui Real Madrid lakah point hnihin hma an hruai mek.