Samuel-a'n Odisha a zawm

Mizo midfielder hriat hlawh Samuel Lalmuanpuia chuan kum hnih chhung atan Odisha FC a zawm a, Zemabawk tlangval hian Kerala Blasters nena an contract-ah South Indian club tana khelh chhunzawm tura contract thar ziah theihna nei mah se Odisha lam a hawi ta a ni. 

Shillong Lajong captain hlui Samuel-a hian season hmasa ṭan dawn khan Indian Super League-a a club hmasa ber ni turin Blasters a zawm a, mahse Kerala club tan hian match nga bak a khel hman lo - khelmualah minute 59 chiah hun a hmang. 

Samuel-a chuan, "Khelhna hmun tam zawk chan theih ka beisei a, hun ṭha ka neih theihna tur nia ka ngaih lamah ka kal ta a ni," tiin Odisha a zawm chhan Vanglaini a hrilh. 

Zemabawk tlangval hian 2015-16 season khan Shillong Lajong tan a professional career ṭanin a khel ṭan a, club captain dinhmun hial chelhin 2018-19 season khan Minerva Punjab-ah AFC Cup khel turin loan-in a kal. 

Shillong lamah kir tawh loin Blasters a zawm zui a, Odisha tana khel turin a puanthuah a tel leh dawn ta.