Chelsea khelmualah Arsenal

Premier League en tur a awm leh ta a, favang boruak kara EPL en tinuam zual turin inkhel hmuhnawm bik a awm leh dawn zui - zanin dar 10:00 hian Chelsea khelmualah Arsenal an lenglut dawn.

Mikel Arteta enkawl Gunners hi season bul ṭan ṭha pangngai tak an ni, hmahruaitu Tottenham Hotspur nen an point hmuh a inzat. Blues erawh bul ṭan fuh lo an ni a, mahse insiamṭha tawhin an boruak pawh a fuh chho mek, mikhual dawn an huphurh lo ang.

Arteta chuan, "Chelsea hian player ṭha tak tak an nei a, anmahni khelmual Stamford Bridge-a inkhel tur kan ni bawk. Keini pawh kan boruak a ṭha, hnehna chan tumin kan lenglut dawn a ni," tiin a sawi. London Derby a hmuhnawm ngei dawn e.

Saka a dam

Arsenal manager Arteta-a'n nimin tlai khan chanchinbumite a kawm a, a forward ṭha Bukayo Saka chu inkhel turin a inpeih tih a sawi - Gunners ṭantute tan chuan England international dam thu hi chanchin ngaihnawm a ni ang.

Saka hian season hmasa khan Premier League match a khel kim vek, tun season kal laiah pawh rinrawl a ni. Mahse, Manchester City an hneh ṭumin a inlan thei lo, a hnuah England tan a feh chhuak thei lo zui bawk.

Arteta chuan, "Chelsea hmachhawn a duh tih ka chiang, player dang ang bawkin inkhel bul ṭantu nih pawh a duh," tiin Saka chungchang a sawi, chawlhkar hnih chhung match khel hah lo a nih avangin Blues lakah a khelh ngei a rinawm.

Saka dinhmun a ṭha a, hetih lai hian William Saliba dinhmun a chiang lo thung. France international hian tun season EPL minute zawng zawng a la khel vek a, an khingpui player ten an la bum miah loh Arteta chuan Saliba kezungpui hliam chu an endik leh tur thu a sawi

Chelsea boruak

Kai Havertz leh Jorginho te an lo mikhual dawn a ni a, an player pahnih chhauak tate aia an thlan zawk player thar ten an hmun ruak an luah zo em, tih chu a takin kan hmu dawn - coach Mauricio Pochettino tan fiahna a ni bawk ang.

Moises Caicedo leh Enzo Fernandez te an nei a, an khelh fuh ni chuan team lian dang midfielder-te awpbet turin an ṭha tawk. International break neih hma an match hnuhnung pathumah an chak thei, an boruak kha neih let leh nghal an tum dawn.

Tlarhma lam hi Blues buaina a ni ṭhin. Striker rinrawl tur Christopher Nkunku a inhliam a, tlarhma laia khel turin Nicolas Jackson erawh a hman theih dawn. England tana kohna dawng lo Raheem Sterling pawh Gunners tana ven ngun ngai tur a ni ang.

Chelsea hi EPL bikah Arsenal an hmachhawn hnuhnung panga zinga vawi liah an chak lo, ṭum khat chu an inhnehtawk. Blues tan an record duhawm lo tak hi tihtawp a pawimawh, an chak a nih chuan season bul an ṭan fuh lo siamṭhat theihna remchang a ni dawn.