Uttarakhand hmaah Mizoram bukin an awm dawn
Santosh Trophy-ah Mizoram chuan October 22, Pathianni tlai dar 3:30 hian Uttarakhand nen an inkhel dawn. Team pahnih hian final round luh beiseina an la nei ve ve a, chutihrualin inkhel hmuhnawmna tur erawh draw a thiang lo - chak a ngai ve ve.
Seeded no 3
Mizoram hian tun hnaiah result an neih ṭhat loh avangin an group-ah seeded pathumnaah an awm a, hei hian fixture-ah nghawng lian tak a nei.
Group E-ah nikum semifinalist Services chu seeded an ni a, Uttarakhand hi pahnihnaah an awm. Hei vang hian team pahnih hi group match hnuhnung berah an inkhel dawn a, Mizoram erawhin team ṭha ber Services chu match hmasa berah an hmachhawn a ngaih phah thung.
Uttarakhand hian team ṭha Services leh Mizoram an la hmachhawn lo a, an khingpui an la hneh vek avangin final round luh beiseina sang tak an nei ang.
Sikkim hnehtu
Group E-ah hian Sikkim chu team ṭha palina angah an ngaih theih a, Mizoram leh Uttarakhand hian 1-0 ve vein an hneh. Sikkim an hneh dan aṭanga chhut chuan inchhuang tur an awm lo ve ve.
Chutihrualin Sikkim leh Uttarakhand te hi team inang lo tak an ni. Uttarakhand player-te hi ball thiam lo zawkin lang mah se thahrui an ngah a, ball an zo ṭha a, an khelh dan a him zawk.
Uttarakhand hian Sikkim an hneh hnuah Pondicherry 7-1 in an sawp a, DNH&DD chu 2-0 in an hneh leh bawk. An inkhelh tawhnaah set piece an hmang ṭangkai a, Mizoram tan pawh ṭul loa freekick leh corner kick chawi pumpelh a ṭha ang.
Mizoram lam hi...
Mizoramin ground awm dan an hre chho a, match tinah hmasawnna hmuh tur a awm zel. Vawiin inkhelah pawh Mizoram hi team ṭha zawk an ni a, chak tura rinkai pawh an ni.
Amaherawhchu khelmual chhungah chuan eng result pawh thleng thei a ni a, Mizoram tan zuam sual theih an ni. Damlohna avangin R. Malsawmtluanga match hnih a awl tawh a; defender Lalhmunmawia, midfielder Johny Lalremruata leh forward Suanngaihmuana te an damlo leh bawk.
Mizoram vanneihna erawh Uttarakhand hmachhawn hmain ni hnih inpuahchahna hun a awm a, player damlo ho pawh an ziaawm hman beisei a ni.
Engtin zel?
Mizoramin match thum khelh tawhah goal sarih an khung a, goal ruk hi Lalkhawpuimawia khung niin match hnuhnung pahnihah man of the match-a thlan a ni bawk.
Mizoram coach Lalsangzuala Hmar chuan, "Kan zinga Mapuia a tel hi kan lawm a, kan ṭangkaipui. Chutihrualin football chu team a khelh ṭhin a ni a, kan vaiin kan ṭanrual a ngai. Coaching staff, bench-a awm leh khelmuala inlante kan inthurual vek a ṭul a ni," tiin Vanglaini a hrilh a, Mizoram tan theihtawp an chhush tur thu a sawi bawk.