Santosh Trophy kalhmang Mizoram beiseina chu

77th National Football Championship for Santosh Trophy group stage chu khelh mek a ni a, group pali khelh zawh tawh niin final round lut tur team 12 zingah pasarih a chiang tawh.

Arunachal Pradesh-in final round an thlen dawn avangin an tling nghal a, nikum finalist Karnataka leh Meghalaya te a ṭha 12 zingah an tel nghal bawk.

Group winner

Team 35 chu group parukah ṭhen an ni a, group tin aṭangin pakhatna zel an tling nghal. Group A-ah Goa chu pakhatna an ni a, anni hian Gujarat draw mah se match tawp berah an intum hmaa khingpui hneh vek Kerala chu 1-0 in an hneh.

Group B-ah Delhi pakhatna an ni a, West Bengal nen an inhnehtawk tih loh chu an chak vek. Santosh Trophy-a record nei ṭha ber West Bengal an tla. Odisha pawh hun rei zawk pahnihnaah awm mah se match tawp bera Delhi an hneh loh avangin pahnihna nichunga final round luh beiseina a tawp bawk. Group B-ah hian Odisha nena point inang hmu Punjab chu goal difference hmangin pahnihna an ni.

Group C-ah Manipur-in an khingpui hneh vekin pakhatna an ni a, Assam pawhin an khingpui hneh vekin group D aṭangin an tling ve bawk. Goa, Delhi, Manipur leh Assam te chu pakhatna nichunga tling tawhte an ni.

Group E-ah Services-in an khelh hmabak DNH&DD leh Uttarakhand an hneh chuan pakhatna an ni dawn a, group F-ah Maharashtra pawh hmahruai turin dinhmun ṭha takah an ding.

Pahnihna tiṭha pathum

Group paruk aṭangin pahnihna tiṭha pathum an tling leh dawn a, group paliah pahnihna a chiang tawh. Chutihrualin group A-ah final round thlengtu tur Arunachal Pradesh an inlan kher loh avangin panga chauh an awm.

Hei vang hian group panga dang (group B-F) ah table hnuai bera awm team an hmachhawnna chu lak tel a ni lo. Group A pahnihna Kerala, group C pahnihna Uttar Pradesh leh group D pahnihna Railways te hian an khingpui an hneh vek.

Kerala te group-ah hi chuan panga an awm a, Railways hian an group-a table hnuai bera awm Bihar 1-0 in an hneh. Hemi result tel lo hian Railways goal difference hi 10 a ni a, Kerala nen an goal khung zat leh chhuah zat a inang chiah. Team pahnih hi pahnihna nichungin final round an tling tawh.

Uttar Pradesh hian Manipur tih loh an hneh vek a, mahse an goal difference a ṭha lo. An group-a table hnuai bera awm Jharkhand an hnehna 2-1 paih hnuin an goal difference chu 2 chauh a ni. Group B pahnihna Punjab-in Odisha leh Delhi an hneh lo a, Haryana 2-0 an hnehna paih hnuah match li aṭangin point ruk an hmu - beisei tur a awm tawh lo.

Group F-ah pahnihna a la chiang lo a, chutihrualin point an hloh tawh dan thlirin beisei tur an nei tawh lo. Tuna a lan dan chuan pahnihna hmunruak pakhat la awm hi Mizoram awmna group E leh Uttar Pradesh ten an inchuh.

Mizoram hian an khingpui an hneh vek chuan Uttar Pradesh chungah hian goal difference hmangin an awm mai dawn a, amaherawhchu Mizoram beiseina ang tho hi Uttarakhand beiseina a ni. Uttar Pradesh duhthusam chu Mizoram leh Uttarakhand in draw a ni thung. A tawi zawng chuan Mizoram kutah engkim a la awm.