Merseyside derby - Liverpool-in Everton mikhual dawn
English football-a inkhel ngaihven hlawh ber pawl Merseyside derby chu vawiin tlai dar 5:00 hian khelh a ni dawn a, Liverpool khelmualah Everton an lenglut dawn.
Tun dinhmunah club pahnih hi inthlau viau mah se an intawn dawn apiangin an thawnthu hlui, duhawm lo tak takte chu phawrhchhuah a ni ṭhin a, tun ṭumah pawh thawnthu a danglam tam lo.
Hei vang hian vawiin tlai an intawng tur pawh hian ngaihven a hlawh ang tih a chiang a, Sean Dyche-a hnuaia insiamṭhat tum mek Everton hian Liverpool an hneh a nih ngat chuan squad-ah phurna nasa tak a thlen ngei ang.
Liverpool an buai
International break-ah Scotland tana inlan, Liverpool left back Andy Robertson a inhliam a, Reds hian an defender pawimawh tel loin ṭhenawm club an mikhual a ṭul dawn. Chutihrual chuan Liverpool hian Kostas Tsimikas an nei tho tih hriat a ṭha.
He thu buatsaih a nih lai hian Robertson-a hliam hi engtianga rei nge a nih dawn, sawi a la awm lo a, a chawlh rei dan a zirin Liverpool hma hun a chiri thei - Reds hian left back-a khel thei Robertson leh Tsimikas chiah an nei a, Everton laka inpuahchah nan academy player Calum Scanlon chuan first team zingah training a nei ve.
Thiago Alcantara leh Stefan Bajcetic te chu engtikah nge an lo kir dawn sawi a la harsa a, dam tawh pawh ni se Everton hmachhawn nan a la hma hret ang. Liverpool tan hrem vanga Brighton & Hove Albion hmachhawn thei lo Diogo Jota a lo kir a, inhliam Cody Gakpo hma hun a la chiang lo thung.
Buaina chinfelna
Tun season-a Liverpool buaina langsar chu tlarhnung an la inchingfel lo hi a ni a, fan-ten zaninah inchingfel turin an beisei ang. Reds boss Jurgen Klopp-a tan Alexis Mac Allister hi number 6 a ni lo, tih hriat a hun tawh a, a ṭhatna ber tlarhma lam puih tir a, Wataru Endo a rin ngam a hun.
Reds hian an league match hnuhnung pahnih aṭangin point khat chiah an hmu a, champion tum tan a zawna match thum chak zawh loh hi mualphona a ni dawn - Reds hian goal khung chu an thei a, a venhim lam an ngaih pawimawh tel a ṭul.
Zanina Liverpool mikhual tur Everton hi an league match hmasa pangaah chak an nei miah lo. Tun hnai match thumah vawi hnih an chak a, an match hnuhnung berah Bournemouth chu 3-0 a an sawp avangin inrintawkna nen Anfield an pan ang.