Casemiro inkhel dawn lo

Manchester United midfielder Casemiro chuan Brazil tana a fehchhuahna lamah hliam tenau a tuar a, zanin dar 12:15-a Man United leh Sheffield United te inkhelh hunah a inlan ve thei dawn lo.

Brazil international hian World Cup qualifier-ah Venezuela leh Uruguay te a hmachhawn a, hliam na tak ni lo mah se Ningani kha chuan an ramah inenkawlin a la awm tih English club hian an tarlang.

Casemiro hian season bul a ṭan fuh tawk lo - Champions League lama Galatasaray an hneh loh ṭumin hnawhchhuah a ni a, league lamah pawh Brentford an hmachhawn ṭumin ama tihsual vangin goal an chhuah.

Midfielder Casemiro a inlan theih dawn loh lai hian defender Sergio Reguilon erawhin training pangngai a zawm, coach Erik ten Hag-a'n a duh a nih chuan Spanish player hi a chhawr thei tawh ang.

Man United hian beisei an phak rih lo - Premier League match vawi riat an khelh aṭangin point 12 an hmu a, table-ah 10-na an ni mek. Dutch manager Ten Hag-a'n a dinhmun derthawng siamṭha leh turin Sheffield an hneh a pawimawh dawn.