'King Kohli' - ropuinate nei tlak i ni e!

Inrinni zan khan Cricket World Cup-ah India chuan wicket sarihin Bangladesh an hneh a, Virat Kohli chuan cricketer ropui bik a ni tih pholang nawnin run 103 ngawt a vaw chhuak.

Kohli hian ODI-a century vawi 48 a vuak chhuahna chiah a ni a, ODI century siam hnem ber Sachin Tendulkar-a record vawi 49 nih rual turin vawi khat 100 vuakchhuah chiah a mamawh ta.

Kohli chuan, "Ka team tana thawhhlawk nih kha ka duh ber a ni. World Cup-ah hian 50 chu ka lo siam fo tawh a, mahse, a hmawr ka bawk ṭhin lo. Chuvang pawh a ni pakhat ang - rei tak ka lo tih tawh ṭhin anga a hmawr bawk hram kha ka duh a ni.

"Fans heti zozai hmaa mahni mual ngeia khelh chu a nuam takzet a, kan hun ṭha neih hi bawhpelh loh hram kan duh a ni," a ti a, India leilung ngeia nomawi chawi a châk.

Maharashtra Cricket Association Stadium, Pune-a inkhelah ṭhumvawra vannei zawk Bangladesh-in bat hmasak an thlang a, bul ṭan ṭha viau mah se an zuih ral - Liton Das (66 runs) leh Tanzid Hasan (51) ten bul an rawn ṭan ṭha viau.

Mahse, Mahmudullah-a'n run 46 a rawn siam ve leh tih loh chu Bangladesh batter zingah run 40 vaw kai dang an awm tawh lo - over 50 chhunga run 256 vaw chhuakin, wicket riat an hloh a, India tan mahni muala um atan a huphurhawm lo.

Men in Blue tan Rohit Sharma (48) leh Shubman Gill (53) ten bul an rawn ṭan ṭha nghal viau a, India an hawikir leh tawh lo - Kohli chuan ball 97 a hmachhawnah run 103 zet a vaw chhuak a, KL Rahul chuan run 34 siamin a tawp thleng a dinpui bawk.

India hian over 41.3-ah target hi an um phak fel der a, wicket thum chiah an hloh - match li an khelh tawhah an la chak vek a, Pathianni chawhnu dar 2:00 hian anmahni ang thoa match lia la chak vek New Zealand nen an inhmachhawn dawn. A hmuhnawm loh ring suh.