Djokovic bul ṭanna tur United Cup

Tennis season kal lai a la zo lo deuh a, player ṭhenkhat chuan season thar bul an ṭanna tur an tichiang leh der tawh. Mipa world number 1 Novak Djokovic chuan a tournament khelh hmasak ber tur atan United Cup a thlang.

United Cup hi kumin December 29 aṭanga nakkum January 7 chhunga khelh tur niin, ram leh ram mixed team hmanga inelna tur a ni ang. Djokovic hi mimal inelna aiin an ram Serbia tan a inlan hmasa leh dawn tihna a ni.

Ram hrang hrang 16 inelna turah hian hmeichhe player ṭha Iga Swiatek awmna Poland pawh an inlan dawn, player ṭha nei tam United States pawh inlan tur zingah telin Carlos Alcaraz te ram Spain pawh an tel a rinawm.

Spain hi an tel a nih pawhin Rafael Nadal erawh a la inkhel dawn lo. Grand Slam vawi 22 champion tawh Nadal hian kum 2024 January thla chawhnu lama khelh tur Australian Open chu khelh a tum a, a hma lama inelna a hmachhawn tur erawh a la tichiang lo.

Tun season atan chuan inelna lian Grand Slam a zo tawh - tunlai hian Asia khawmualpuiah inelna tenau deuh hrang hrang an khel mek. Season hmawr bawk nan ATP leh WTA Finals erawh khelh hmabak an la nei.

US Open champion a nih hnuah Djokovic-a'n mimal inelna a la hmachhawn leh rih lo. Serbia tan erawh Davis Cup a khel leh tawh thung, tun dinhmunah a lo kir hun tur a la sawi chiang rih lo.