Mitoma tan contract thar

Brighton & Hove Albion winger Kaoru Mitoma chuan contract thar a ziak a, June 2027 thleng Premier League club-ah hian a khel dawn. Kum 26 mi Mitoma hian August 2021 khan Kawasaki Frontale aṭangin Brighton hi a pan a, Belgian club Royale Union Saint-Gilloise-ah season khat loan-in a khel zui.

August 2022 khan English club tan a match hmasa ber a khel ṭan a, match 52-ah goal 13 khungin assist vawi 12 a nei - season hmasa khan league-ah goal sarih khungin assist vawi nga a nei a, tun season-ah league match riata khela goal thum khungin assist vawi thum a nei.

Brighton boss Roberto de Zerbi chuan, "Karou hi top player a ni a, kan tan chuan chanchin lawmawm a ni," a ti a, Brighton technical director David Weir chuan, "Karou-a te ang quality nei player-in kan hnena cham zel an thlang hi chanchin lawmawm a ni," a ti ve bawk.

International break hmaa 2-2 a Liverpool inhneh-tawkpuitu Brighton hian zanin dar 7:30-ah Manchester City an lenchilh dawn a, champion lai City nena an inkhel tur hi en a châkawm hle - Pep Guardiola team hi an league match hnuhnung pahnihah Wolverhampton Wanderers (2-1) leh Arsenal (1-0) ngam loin an tlawm a, team huaisen Brighton hian hneh an tum ngam ang.