Silly Point: FAVANG SIPICIAL

Ruah leh khawchhiain a tihbuai lem loh, favang daifim tla erawhin team te game plan siam dan tur nghawng nei thui tak, Khuangchawi thla World Cup cricket league stage round lina chu khelh ṭan mek a lo ni leh ta a. Thlengtu branch Hamara Desh lamin mikhualte lakah khelmual chhungah chuan ṭhat chhuah an tum hauh lo a, ram pali an hmachhawn tawhte chu hnehsawh takin an la tukzal zel hrih chu a ni.

Bharat Zindabad

Pune khelmual ground zau lem lo tak, a pitch lah batting atan duhthusamah, Bangladesh-in bul an ṭan ṭha viau a, run 350 tal an siam loh chuan, India batting line up han tiluhai tham tur a ni dawn lo tih an hre reng. Engemawchen kha chu 300+ siam mai tur pawh khan an mawi. Amaherawhchu an tum luatah an tawlhthlu a, run 256 lek an vawchhuak kha chu, Rohit Sharma leh a hote um atan chuan a tlem lua a ni.

Holy Alpha Trinity

India batting line up top 3-te tun World Cup-ah, tumpuite zan mut chhin tihar tur khawpin an form a ṭha a. Damkawr Shubman Gill pawh dengue vei tih hriatloh khawpin a sapatal nghal a. Ningani zan erawh, target um thiam hmingthang, cricket arsi lian Virat Kohli a chet hun a rawn inherchhuak. One day international bika a century vawi 48-na a vuak chhuah zanah khan, thil a tisual thei ta lo emaw tih mai turin a bat an chelek a nih kha. Tuna India tumpui leh turte team tin Video Analysis te chuan uluk takin Rohit Sharma, Virat Kohli leh Shubman Gill te khelh dan leh an panna lai lo zawn char char hi an tihtheih awmchhun a ni mai awm e.

Sunday Funday

Naktuk tlai dar 2 a lo inherchhuah meuh chuan, tun World Cup-a an inkhelh dan en chinah, expert tam zawkin finalist tura an rin ber team pahnih, India leh New Zealand te chu, Himalaya tlang ep, Mizoram aia thlasik pawh tawh zawk, Dharamshala, Himachal Pradesh Cricket khelmualah an inchaltauh dawn a ni.

India hi saipui kal lai nena kan tehkhin a nih chuan, Kiwis ho hi an kulhpui nghet Kane Williamson a la inlan manglo chung hian, tihsual nei mang lova, zawi dam dapa sazupui leh satel intlansiaka, satel dinhmun nen khan a khaikhin theih awm e.

Buddhist Monk leh daifim

Dharamshala Stadium pitch hi tun World Cup-a kan hmuh chinah chuan ball a sawt ṭhain, a pace a ṭha a, fast bowler ho an la che ṭha fu a, chutih rual chuan ball hi bat-a a rawn kal ṭhat avang hian batsman tan timing a awlsam a, a khelmual a lo zau lutuk lo nen, runs tamtak vuakchhuah theihna a ni. Mizoram ai maha sea level-a sang zawk he tlang ramah hian thlasik dai a tla tam ṭan hle a. Kaptan ṭhumvawra vannei zawk chuan vawm hmasak an thlang a nih pawhin thilmak a ni kher lo ang.

Tun World Cup bika an chevel han en chuan 50-50 in kei chuan ka dah a. Professional sports ah hi chuan thil ropui danglam thlen tum ai mahin, tihsual nei tlem zawk apiangte dinchanna hmun hi a ni tlangpui a. Mipui sing chuan zi hut hut leh World Cup pressure sang tak karah hian, he India rama Buddhist ho kulhpui Dharamshala khuaah hian, Pathianni zan inkhel turah pawh, Buddhist Monk ianga, thluak fim leh ngaihtuahna dam leh chi ai lo zawk zawk an dingchang mai dawnin ka hria.