Real Madrid leh Sergio Ramos an intawng dawn!

International break a zo a, club football en tur kan nei ṭan leh ta - La Liga pawh nizan aṭang khan khelh ṭan a ni a, zaninah khelh chhunzawm a ni dawn.

Inkhel nghahhlelhawm tak pakhatin min hmuak der a, chu chu zanin dar 10:00-a Sevilla leh Real Madrid inkhel tur hi a ni. Club pahnih dinhmun thlirin inkhel en châkawm angin lang lo mah se mipuiin nghahhlelh chhan an nei.

He inkhelin ngaihven a hlawhchhan hming chu Sergio Ramos a ni. Spanish defender hian Sevilla aṭanga a career ṭanin Real Madrid-ah a vanglai hun a hmang a, a career tawp lamah Sevilla bawk a pan.

Zaninah Sevilla jersey ha chungin Real a hmachhawn dawn a, Ramos-a'n season 16 zet hun a lo hman tawhna club laka hnehna chan tuma a bei tur hi khawvel hmuh châk chu a ni.

Hmangaih hmasa

Ramos hi Camas, Seville-ah March 30, 1986 khan a piang a, kum 10 mi lek a nih laiin Sevilla hi a pan - an khaw club hian Ramos hi a mamawh tinreng pein an chher hriam a, February 2004 a thlen meuh chuan kum 17 mi lek niin club tana a match hmasa ber a khel der tawh.

Sevilla tan hian season hnih bak a khel hman lo. Kum 2005 khan Real Madrid chuan Spanish defender ṭhangduang hi euro maktaduai 27-in an la chhuak a, Real-a a season hmasa berah hmun pawimawh chang nghalin match 46 ngawt a khel.

Real tan hian season 16 khel zuiin match 671-ah ngawt a inlan a, goal 101 a khung. La Liga (5), Copa del Rey (2), Spanish Super Cup (4), Champions League (4), UEFA Super Cup (3) leh FIFA Club World Cup (4) ah te champion nomawi a chawi.

Mahse, thil zawng zawngin tawp hun an nei angin, Real-a Ramos hun hman pawhin tawp hun a nei a, a vanglai hun zawng zawng a hmanna Real chuan kum 2021 khan ui lo takin an thlah.

PSG - Sevilla

Ramos hian Real a chhuahsan dawn khan, kum khat contract pawh sei a, hlawh tihhniam a pawm thlap thu a sawi a, mahse, Real lamin a hriat lohin an contract zawrh chu a tawp hun an lo siam si a, mittui nen Santiago Bernabeu a mangṭha.

Spanish defender hian Paris St-Germain a zawm zui a, mahse, hliamin a tlak buak fo avangin a beisei angin season a hmang lo. Tun season ṭan dawnah sawmna hrang hrang la dawng nual mah se amah siam liantu Sevilla lama kir a thlang.

Mahse, Seville mipui zawng zawngin Ramos hi an lo lawm hauh lo. Sevilla ṭantu pawl Biris Norte chuan an club-in Ramos an la let chu an lawm loh thu thuchhuah siamin an sawi a, "Tun dinhmun thleng tura min chhertu kan nihna zah lohna a ni.

"He club tana theihtawp chhuah ṭhin kan legend leh Ramos ngeiin a lo tihel tawh Sevilla fans sang tam tak zah lohna a ni," an ti a, Ramos an la let chu an lawm lo hle - kum 2017 khan Ramos hian Sevilla lakah Real tan panenka penalty hmangin goal a khung a, a lawm chiam. Sevilla fan-ten an theihnghilh thei lo.

Khelmualah

Sevilla khawpuia infiamna chanchinbu lar Estadio Deportivo chuan tun hnai khan an khaw club tana centre back inkawp tura an duh mipuite an thlantir a, Ramos-a telna chuan 29% bak vote a hmu lo a, Nemanja Gudelj leh Loic Bade inkawp chuan 71% an hmu thung.

Hemiin chiang taka a pholan chu Ramos duh lotu hi Sevilla fans-ah an la tam zawk. Chutihrual chuan coach Diego Alonso hian huai takin thutlukna a siam dawn nge, Ramos tel loin tlarhnung a rem dawn, hriatthiam a har.

Sevilla hian season hmasa Europa League nomawi chawipuitu Jose Luis Mendilibar an ban hnuah Diego Alonso an la lut a, South America pawna team la enkawl ngai lo coach hian a club kaihhruai hmasa berah Real a hmachhawn dawn!

Chuti a nih chuan kum 37 mi Ramos-a tawnhriat leh Real a hriatchianna hi chhawr tumin Alonso hian Ramos hi bul a ṭantir mai thei a, a inlan a nih ngat chuan Real tana 'mi thar' Jude Bellingham nena an intawng vel tur hi football fans inti tan chuan en loh phal chi a ni lo.