Goalkeeper vanga buai Milan

Serie A hmahruaitu AC Milan chuan Pathianni zan dar 12:15 hian Juventus an mikhual dawn. San Siro-a inkhel turah hian Milan chuan goalkeeper chungchangah harsatna an tawk.

Milan keeper ṭha Mike Maignan chuan hrem vangin Old Lady a hmachhawn thei dawn lo, hei bakah hian Marco Sportiello chu chawn hliam vangin a chawl mek bawk - anni pahnih an theih dawn loh avangin kum 40 mi Antonio Mirante a inlan a ngai dawn niin a lang.

Italian club Milan thuchhuah tarlan dan chuan, an second-choice goalkeeper Sportiell hi ni 10 chhung vel a chawlh a ngai dawn. French international keeper Maignan pawh an match hnuhnunga Genoa an hmachhawn ṭuma hnawhchhuah a nih avangin hrem a ni.

Stefano Pioli-a'n goalkeeper ṭha pahnih bakah Theo Hernandez a chhawr thei dawn lo. France international hian tun season kal laiah yellow card vawi nga a hmu tawh a, hei vang hian match khat khel thei lo turin an hrem.

Milan hian Serie A match vawi riat an khelh tawh aṭangin point 21 an hmu a, table hmahruaitu an ni. Old Lady hian point 21 an nei thung a, champion tuma inum tur an nih avangin anmahni pahnih inkhel hi a pawimawh dawn.