ISL hun a thleng e

International break avanga an chawlh vang vang hnuin Indian Super League pawh khelh chhunzawm a ni leh dawn ta a, vawiin tlai dar 5:30 hian East Bengal chuan FC Goa an mikhual ang.

East Bengal hian Carles Cuadrat kaihhruaina hnuaiah beisei sang takin season bul ṭan mah se, league match thum an khelh tawhah vawi khat chiah an la chak a, insiamṭhat an mamawh.

Kolkata club hian Lalchungnunga leh Vanlalpeka Guite chu Mizo player an kawl a ni a, FC Goa hian Mizoram midfielder Ayush Chhetri an kawl ve bawk.

Kerala Blasters-in an match hmasa pahnihah hnehna changin beisei an nei sang viau a, mahse, an match hnuhnung bera boruak 'hot' takah Mumbai City an ngam lo - zanin dar 8:00-ah NorthEast United an mikhual dawn.

Blasters hian midfielder ṭhangduang Freddy Lallawmawma an nei a, Highlander hian midfielder Fredy Chawngthansanga leh forward Rochharzela an kawl thung.

Pathianni zan ISL-ah inkhel pakhat a awm dawn a, zan dar 8:00-ah Jamshedpur FC chuan kai thar Punjab FC an mikhual ang. Men of Steel hian defender Ricky Lallawmawma leh PC Laldinpuia an kawl a, Punjab-ah Brandon Vanlalremdika leh striker Daniel Lalhlimpuia an awm bawk.