Mizoramin Uttarakhand hnehin final round an hnaih

Hero Senior National Football Championship for Santosh Trophy-ah Mizoram chuan nimin khan an elpui Uttarakhand chu 1-0 in an hneh a, final round lut turin beisei nung an nei. Lalsangzuala Hmar hote hian match hnuhnung berah Pondicherry an hneh chuan Arunchal Pradesh-ah an zin thei ang.

Amritsar, Punjab-a inkhelah Mizoram tan Champhai Kanan tlangval Laltlanzova'n goal awmchhun a khung. Group E inkhel dangah Pondicherry-in Sikkim 2-1 in an barakhaih a, Services-in DNH&DD 6-1 in an sawp bawk.

Msa a dam

Mizoramin an khelh dan tur milin player leh khelh dan an siksawi a, Uttarakhand an hmachhawn ṭumin Services an hmachhawn ṭuma an khelh dan 4-4-1-1 an hmang leh chiah.

Goalkeeper-ah F. Lalmuanawma a awm a, tlarhnungah captain Lalrinchhana Tochhawng leh Lalhmunmawia te inkawpin muak sirah Lalrinzuala Khiangte leh Lalmawizuala te an awm.

Midfield-ah player thawkrim pahnih H. Lalbiakthanga leh Johny Lalremruata te an inkawp a, R. Malsawmtluanga dam tawhin playmaker hna chelhtir a ni. Goal nawr turin match thuma goal ruk khung thei Lalkhawpuimawia a awm a, mualsirah Lallawmsanga leh Vanlalthanga te an awm bawk.

Bul ṭan ṭha lo

Uttarakhand-in tharum nen bul an rawn ṭan ṭha a, chance ṭha bik insiam lo mah se tlarhnung an ṭhawng buai ve reng. Corner kick ringawt pawh vawi riat an hmu a, Mizoram an talbuai.

Chutihrualin Mizoram lamin chance ṭha bik an insiam thung a; Mapuia ball fing chu LS-a'n um lutin keeper-in a dan sak. Vanlalthanga pawhin a ke vei lama volley rem tur takin ball a zawnah tla fuh mah se a pet over.

A hunah Zozoa

Second half ṭan chiahah Champhai Kanan tlangval Zozoa a rawn lut a, Mizoram pawh an khel ṭha ta. Substitute Zozoa ball pet chu goal line aṭangin an pet chhuak hman a; Johny leh Msa ten an khung teuh viau bawk.

Minute 68-naah Mizoram hun a inher chhuak a, box chhungah Zozoa rilru a fim. Chanmari FC forward hian kawh zetin a pet goal a, goal hlu bik a ni. Zozoa hian chance ṭha dang pawh a nei a, a khung tawh lo.

Mizoramin tlarhnung an tiphui a, man of the match a thlan BT-a chu midfield thununtu a ni. Defender pali an khel ṭha a, goalkeeper Muanawma'n ball kang a lo nalh nalh. Coach Sanga hote an ṭang tluan a, 1-0 in hnehna an chang.

Tute nge tling tawh?

Santosh Trophy-ah hian team 12-in final round an khel dawn a, heng zinga team 10 chuba chiang tawh. Inelna thlengtu tur Arunachal Pradesh bakah nikum finalist Karnataka leh Meghalaya te chu tling sa an ni.

Group paruk zingah group nga khelh zawh a ni tawh a; group tina pakhatna Goa, Delhi, Manipur, Assam leh Maharashtra te an tling tawh. Mizoram awmna group hi la khelh zawh ni lo mah se match lia la chak vek Services hi tlinga chhal theih an ni tawh bawk.

Pahnihna tiṭha pathum an tling dawn a, Kerala leh Railways te an goal difference a ṭhat avangin hmunruak pahnih hi an hnawh khat tawh. Hmunruak pakhat a la awm a, Mizoramin an match hnuhnung bera Pondicherry an hneh chuan final round khel turin an tling bawk ang.