Brighton lakah City an chak

Premier League match hnih a zawna an tlawm hnuah Manchester City an insiamṭha a, Inrinni zan khan an mikhual Brighton & Hove Albion chu 2-1 in an hneh - league-ah Arsenal nen an point hmuh zat inangin hma an hruai. Zanin dar 12:30-ah Tottenham Hotspur-in Fulham an mikhual dawn a, an chak chuan Spurs hian table chung ber an luah leh ang.

City tan Julian Alvarez chuan minute sarihna lekah goal hmahruai a khung a, Erling Haaland chuan minute 19-naah a belhchhah ve leh bawk - City tan match thum a zawna goal a khung loh hnuah Halaand-a'n a khung ve leh ta a, Brighton defensive midfielder Carlos Baleba tihsual a chhawr ṭangkai.

Second half-ah Brighton an insiamṭha hret a, Barcelona aṭanga loan-a an hawh Ansu Fati chuan Manuel Akanji ball petchhuah ṭhat tawk loh zar zoin minute 73-naah a khung a, goal dang erawh a khung belh tawh lo.

Akanji hian hun pek belh minute nganaah a yellow card pahnihna a hmu a, Brighton tan player tam zawk nih chhawr turin hun a tam tawk tawh lo - City an chak a, Pep Guardiola hoa an nomawi humhim an tumna kawngah chetsual tam an duh lo.

City fan-te tana lawmna tur pakhat chu Jeremy Doku a ni a, kum 21 mi winger hi minute 75 khelmuala a awm chhungin a hmuhnawm tluan zak - City tan Alvarez-a freekick goal ta lo a uiawm a, Phil Foden pawhin a chance neih a chhawr loh chu a ui vawng vawng ang.