Chelsea 2 - 2 Arsenal

Premier League champion tum Arsenal chuan Chelsea khelmualah point khat an sual chhuak hram a, mualneitu Blues lamin point thum hmuh an beisei aṭangin point hnih an hloh ṭhen leh thung.

Inrinni zan London Derby hmuhnawmah Cole Palmer-a penalty leh Mykhailo Mudryk-a goal hmangin Chelsea an chungnung hmasa, a tawpah erawh Gunners lamin Declan Rice leh Leandro Trossard te hmanga sutin 2-2 in an inhnehtawk.

Goal hmasa pahnih

Mikel Arteta-a'n si ban nghak turin David Raya a thlang a, Spanish goalkeeper hian a tir lamah Stamford Bridge boruak a zo lo deuh niin a lang, a goal chhuah pahnih chu dan harsa tak a nih rualin, hlauhawm taka chet a nei zauh zauh.

Mual sir aṭanga Raheem Sterling ball cross chu box chhungah William Saliba leh Mudryk ten an inchuh a, Ukraine international Mudryk hian lo tauh fuh hmasain Saliba-a ban a per - VAR hmanga ennawn a nih hnuah penalty an pe.

Penalty pettu Palmer-a'n a khung a, a tir lamah khel ṭha zawk Chelsea lamin an phu ang ngeiin goal an nei hmasa. Arsenal inkhel hi ni dang angin a mam tawk lo, tihsual an ngahin goal hlauhawm pawh an siam hleithei lo.

An sut zo

Mauricio Pochettino-a'n Arsenal beih dan tur a duang fuh a, si hnih faia hma an hruai avangin an dinhmun pawh a ṭha hman takzet. Mahse, goalkeeper Robert Sanchez a chesual ve tho, a ball pet chhuah ṭha tawk lo vangin goal an chhuah.

Rice hma zawnah kher ball a kal a, ani hian laklawh nei miah loin goal lamah pet nghalin si phurh a sut ṭhen. Hun tawp dawn lamah Gunners an phur thar a, bench aṭanga lut Trossard, Kai Havertz leh Emile Smith Rowe ten boruak an siam danglam.

Minute 84-naah Bukayo Saka chuan a sir lehlama awm Trossard tan a cross - Belgium international forward hian ball kang lai chu goal lamah tlawh nghalin keeper Sanchez tan dan hman a ni lo; Blues lamin an goal khung zat an chhuah.

Eddie Nketiah-a'n defender tawnhriat nei ṭha Thiago Silva nena ball an inchuh karah hlauhawm takin a pet thei a, mahse goal ban hrulah a liam. Blues pawhin si hnih faia hma an hruai laiin Nicolas Jackson hmangin remchang ṭha bik nei mah se an chhawr ṭangkai bik lo.

Eng nge an sawi?

Arsenal manager Arteta chuan, "A tirah khan ball kan hloh nasain ni dang kan phak lo hle, minute 25 kan khelh tlin chinah erawh kan insiamṭha ta viau. Chelsea khan khawi hmunah pawh player ṭha tak tak an nei a, chuvangin inkhelh a awlsam lo.

"Chawlhlawk kan hman lai khan insiamṭhat kan ngaih thu leh kan hliam chungchang ka sawi a, chumi hnua ka naute beih let danah khan ka lawm," tiin a naute chuan tlawm duh loin an teihtawpin an beilet tih a sawi.

Chelsea manager Pochettino chuan, "A tawpa goal hnih kan chhuah avangin pawi kan ti hle. Chutihrualin kawng hrang hranga kan hmasawnna a lang kha a lawmawm, team ṭha zawk kan ni tih a lang a, a ṭha lehzual zawk ni turin kan bei mek," a ti.

Blues hian season bul ṭan fuh lo mah se tun hnaiah an insiamṭha chho mek a, tunlai an khelh dan thlir chuan an tan Arsenal lak aṭanga point hmuh kha thil ṭha a ni. Fixture hautak tak an neih chhoh tur atan inrintawkna a pe bawk ang.