Kane leh Bayern an kal zel

Harry Kane-a'n German ram a pan hnuah pawh a goal khung thiamna a keng tel zel. England captain hian Inrinni zan Bundesliga inkhelah goal khat a khung leh a, an mikhualna ramah Mainz chu 3-1 in an hneh.

Bavarians lamin Kingsley Coman leh Kane hmangin an khung hmasa a, mualneitu lamin Anthony Caci hmangin sut ṭhen mah se German champion hian Leon Goretzka hmangin chak an nemnghet.

Thomas Tuchel-a naute hian tun season Bundesliga match vawi riat an khelh tawhah tlawm an la nei lo, anni ang bawk hian Xabi Alonso enkawl Bayer Leverkusen leh Borussia Dortmund te pawh an la tlawm miah lo.

Tottenham striker hlui Kane hian champion châkin Bayern Munich hi a zawm, league bikah goal riat a khung leh der tawh - champion tura rinkai ber pawh an ni. Mahse, tuna a lan dan chuan champion hi thil sawlsm a ni dawn lo niin a ngaih theih.

German rama football inelna sang berah hian pathumna an ni mek a, an chungah hian Leverkusen leh Stuttgart te an awm. Bundesliga bakah hian Champions League an ngaihtuah tel a ngai a ni.

October 24, Thawhlehni zanah Bayern Munich hian UCL group match khel turin Galatasaray an lenchilh ang.