Man United arsi lian Charlton a liam ta

English player piang tawh zinga ropui bera mi ṭhahnem takin an ngaih Sir Bobby Charlton chu 'dementia' natna vangin October 21, Inrinni zan khan kum 86 mi niin a thi. World Cup 1966-a England champion puitu leh hemi kuma Ballon d'Or dawngtu Manchester United legend Charlton thihna hi football khawvel tan channa lian tak a ni.

Charlton hian England tan match 106 a khel a, goal 49 khungin a hun lai chuan an ram tana goal khung tam ber record a ni. Man United tan senior team-ah kum 17 chhung khelin league nomawi pathum, European Cup leh FA Cup te a chawipui a ni.

Tu nge Charlton?

Charlton hi Ashington, Northumberland, England-ah October 11, 1937 khan a piang a, a pa hi lungalhthei laihchhuah hna thawktu a ni. Football thiam chhungkua an ni a, a unaupa Jack pawh hi World Cup-a England champion team-ah khan a tel.

A nu nuṭate pawh Leeds United player Jack, George leh Jim Milburn te an ni a; Newcastle leh England star Jackie Milburn kha nu unau (cousin) te an ni. Charlton hi Man United chhul chhuak a ni a, Man United aṭanga inzir chhuak a nih bakah a ṭhat lai zawng zawng Old Trafford-ah a hmang a, inkhelh a chawlhsan hnuah pawh club board of directors hna te a chelh a ni.

Man United legend

Sir Alex Ferguson hnuaia Man United academy player David Beckham, Nicky Butt, Ryan Giggs, Paul Scholes, Gary leh Phil Neville te an rawn vul khan Fergie's Fledgings an ti. Khami hmaa lar em em mai chu, Busby Babes tih a ni thung. Sir Alex hmaa Man United manager ropui ber Matt Busby pawh khan rawlthar duhawm tak tak a chher hriam a, 'Busby Babes' an ti.

Charlton pawh hi Busby Babes an tih zinga mi a ni a, kum 1956 khan kum 18 mi lek niin first team tan a khel ṭan a, kum 1957-ah hetih laia English Football-a inelna sang ber First Division-ah an champion. Hmabak êng tak an nei a, mahse kum 1958-ah chhiatna rapthlak 'Munich Air Disaster' a thleng.

Man United hian a hun laia club ṭha Red Star Belgrade an hneh a, semifinal an lut. An chuanna thlawhtheihna chu Munich-ah 'fuel' thun turin an chawl a, engine vei lam chian loh vangin ṭum hnih ngawt an hlawhchham. Ṭum thumnaah thlawhtheihna a chesual a, a chuang mi 44 zinga 20 chu a hmunah an thi nghal. Damdawi inah mi pathum thi lehin mi 21 an dam chhuak. Thi 23 zinga pariat hi Man United player an ni.

Charlton hi dam chhuak zingah a tel a, Busby-a'n team thar a dinna kawngah player pawimawh a ni. Charlton, George Best leh Dennis Law te inkawp chu 'Holy Trinity' hming an vuah a, kum 1968 khan European Cup nomawi chawiin English club zinga champion hmasa ber an ni.

Final-ah United hian Benfica 4-1 in an hneh a, captain Charlton hian goal hnih a khung. Kum 1966-a England-in an rama World Cup nomawi an chawi pawh khan player pawimawh a ni. Charlton hi a thinrim thei lo tiin an sawi ṭhin a, a career chhung zawngin ṭum hnih chiah yellow card a hmu. Thahrui a ngah a, passing a thiam a, a goal bawh a na a, shooting a ṭha a - heng a theihna sang tak hi khelmualah a lantir avangin Charlton hi football khawvelin an hre reng tawh ang.

Charlton tana chak kha kan duh
- Ten Hag

Manchester United-in an hmelma Manchester City an hmachhawn huna inrintawkna an neih theih nan Sheffield United 2-1 in an hneh. Old Trafford-a Pep Guardiola hote an mikhual hmain an mualah Copenhagen nen Champions League match pawimawh an khel leh phawt ang.

Erik Ten Hag chuan Blades an hneh zawhah club legend Bobby Charlton thlah nan player-ten chak an duh lehzual thu a sawi. Bramall Lane-a point thum an sual chhuah avangin Man United-in point 15 an hmu ta a, champion rinkai Man City leh Arsenal an phak lohna chu point ruk a ni.

Inkhelh hma darkar li a la awm tihin 1966 World Cup hero Charlton-a thih thu puan a ni a, tun hnaia harhtharna chang Scott McTominay hmangin mikhual team-in minute 28-naah hma an hruai. Mahse, ball-in Scottish midfielder Tominay kut a per avangin penalty a chawi a, Blades tab Oli McBurnie-a'n minute 34-naah siphurh a sut.

Ten Hag-hote hian inkhel an thunun thei lo a, tlarhnungah Diogo Dalot, Harry Maguire, Jonny Evans leh Victor Lindelof te awmin an ṭhat dan ber niin a lang lo. Tun hnaia sawisel hlawh keeper Andre Onana erawh goal venhim kawngah a che ṭha hle.

Second half-ah Man United an insiamrem hret a; Rasmus Hojlund leh Marcus Rashford te hriam deuh se nuam sa zawka chak thei tur an ni. Mahse, goal an khung theih miau loh avangin Dalot chu chhandamtu a ni a, Portuguese defender hian minute 77-naah kawh zetin box pawn aṭangin a pet goal.

Man United substitute Alejandro Garnacho-a'n goal ban a tih per a, hemi hma hian midfielder pahnih Sofyan Amrabat leh Bruno Fernandes ten woodwork an tihper. Minute 90 khelh dan thlirin Man United-in chak an phu a, an game erawh a la nghet lo hle. Ten Hag-a hoten Man City leh club lian dang elpha turin insiamṭhat an la mamawh hle.