Merseyside roreltu chu Salah

Inrinni zan Premier League inkhel ngaihven hlawhah Liverpool an chak a, Merseyside derby-ah an ṭhenawm club Everton chu 2-0 in an hneh - goal khungtu maw? A ngai, Mohamed Salah bawk a ni e.

Egyptian forward hian penatly hmangin goal hmahruai a khung a, hun pek belhah goal khat dang a khung leh bawk. Everton-in a chhanletna an neih loh avangin Anfield-ah an tlawm a, Reds-in kawng dik an zawh zel.

Everton hian hun tam zawk chu player kim loin an khel. Ashley Young-a'n Luis Diaz a veng nasa mah mah a, Colombian forward laka a foul vawi hnih avanga yellow card vawi hnih hmuin, hnawhchhuah a ni.

A tam mah mah!

Jurgen Klopp-a'n Liverpool a enkawl hnuah Everton hi vawi 17 hmachhawn tawhin vawi khat chiah tlawm a la nei a, hemi chungchang press conference-a an zawhnaah, "Match khatin ka duh aia tam ka tlawm a nih chu," a ti a, Everton laka tlawm a duh lo.

Mahse, Inrinni zanah player tam zawka an khel rei chungin Reds hi an duh angin an che hleithei lo a, long range 'shot' nei ṭhin mah se Jordan Pickford tan man nuam tawk vel a ni ṭhin a, Alexis Mac Allister, Darwin Nunez, Trent Alexander-Arnold leh Dominik Szoboszlai ten an chance neih an chhawr lo vek bawk.

Everton hian chance nei lo an ni bik lo. Mahse, Dominic Calvert-Lewin-a'n a chance neih chu Alisson-a zawnah tak a tauh a, Dwight McNeil-a chance neih pawh crossbar chung lamah thawn chhoh a ni.

A chinfelna Salah

Player pakhata khel team Liverpool-in beisei an phak lo a, goal hmu turin an nghah rei a ngai. Minute 75-naah Michael Keane handball vangin Reds hian penalty an hlawh chhuak a, Salah chuan hei hi inringtawk takin goal-ah a chantir.

Liverpool-in goal dang an khung tawh dawn lo anga a lan hnuah Salah bawk a inlar nawn. Darwin Nunez-a siamsak chu hun pek belh minute sarihnaah a khung a, a career-a league goal 201 a khungna chiah a ni.

Kum 31 mi Salah hian tun season inelna hrang hrangah match 11 khelin goal riat ngawt a khung ta a, assist vawi li a nei bawk - a career-a league goal 201 zinga goal 144 zet chu Liverpool tana a khung a ni hial.